Mithianghlim Blaise (+306) February-3

Mithianghlim Blaise

(+306) February-3

          Dang naa a tuar tu pawl a kilkhawi tu Mithianghlim Blaise cu Armenia ah mi lian zet le upat tlak zet mi nu le pa hnenin a rak suak. Christian fimthiamnak cu tha zet in a rak zir ih Sibawi pakhat a rak si. Cui hnu ah Puithiam cannak a ngah ih Sebaste ih Bishop pakhat ah a rak cang.

          Licinius Siangpahrang in Christian pawl a hrem caan ah sahrang pawl um nak lungkua ah a rak relh. Puai zoh nak ih ken mi ramsa pawl a kai tu ramtawi pawl in an hmu ih an kaih hnu ah Armenia ih um Rome khuapi tuanvo nei tu Agarygolause hnenah an kuat.

          An hruai nak lamzin ah nunau pakhat in a hngawng ah nga ruh in a sun ih a thi zik te mi nu a hnenah an rak hruai. A thlacam sak nak ruangah naute cu dam nak a rak ngah. Cui caan ihsin thokin Mithianghlim Blaise cu dang thawn pehpar mi natnak pawl hrangah an rak rinsan zet.

          Cui rei lo te ah thudik hrangih hrem nak hrangah thuthangtha hrangih thah tuar nak pawl hngetkhoh zet in zumnak thawn a rak tuar. Thir zum in a vun pawl an dir ih cu mi nat a tuar hnu ah a lu an rak tan.

          Mithianghlim Blaise ih Puai ni tuah caan ah kohhran mipi pawl ih hngawng pawl ah thluasuah pek mi phayawngtaing pahnih thawn Thinglamtah hminsinnak tuah in thluasuah pek a si theu.

          Cui caan ah Puithiam in “Bishop le myrtyr a si mi Mithianghlim Blaise ih thlacam sak nak thawn Pathian in  dang ih tuar mi nat nak pawl le that lo nak pawl in lo run hram seh. Pa, Fapa, Thiang Thlarau ih hmin in, Amen,” tiin thla an cam. Mithianghlim Blaise hnenah zaangfah bomnak dil tlang uh si. Ahleice in hngawng naa pawl dam theinak dingah thlaza cam tlang uh si.Mithianghlim thuanthu video in a rak theutu le ca in a rak siar theutu zate parah Pathian thlasuahnak um hram seh.