Mithianghlim Camillus (1550-1614) July 14

Mithianghlim Camillus (1550-1614) July 14

         Siizung pawl kilkhawitu Mithianghlim Camillus cu kum 1550 ah Italy ram, Chieti ah a rak suak. A nauhak lai ah ralkap ah a rak lut ih misual pakhat a rak si dah. A kum 25 ah paisa thap ih lehnak ah a neih mi pawl cu zianghman a tang nawn lo ruangah Manfredonia ih um Capuchin Puithiam tlawngah hna a rak tuan. Cui tlawng kiltu Puithiam ih forhfialnak in a thinlung a thleng ih neta lam ah a mah le a mah Pathian hnenah a rak ap aw.

          Capuchin Puithiam tlawng ah luh a duh zet nan a ke ih a ngah mi natnak ruangah luh an rak on lo. Curuangah tih a nung zet mi dinhmun ih a um mi Rome khuapi ih San Giacomo siizung ah a rak thleng. Lainatnak  nei lo mi siizung ih hnatuantu pawl in mina tampi nung cing in an rak phum. Cui dinhmun ah Camillus in duhdawtnak le lainatnak thinlung thawn mina pawl cu suak khat unau vekin a rak kilkhawi ruangah siizung pi ih Supervisor ah an rak nemhnget.

          Puithiam cannak a ngah hnu ah Camillus in siizung pawl kilkhawi dingah pawlkom pakhat a rak din. Camillian pawl ti mi pawlkom sungtel pawl in mina pawl cu Bawi Jesuh, a mah rori vekah ruat in an rak kilkhawi.

          Camillus in, “leilung par ih farah harsa pawl an um lo le leithuai ah hawl in run a tul,” tiah a pawlkom sungtel pawl a rak sim. Kum 1588 ah hrekkhat pawlkom sungtel pawl cu Naple tikap leng ih um suan awk thei mi nat a tuar rero mi pawl tinbaw parah an thleng ih bawmnak hnatuan an rak tuah.

          Hi vekih an tuan ruangah nat suan an tuar ih an nunnak a rak liam tu pahnih cu an pawlkom ih a hmaisabik martyr pawl tiah an rak nemhnget. Mithianghlim Camillus cu Rome khuapi ah kum 1614 ah a rak thi ih Pope Leo III in Camillus cu mina pawl kilkhawi tu tiah a rak than.