Mithianghlim Carlo Acutis thuhla theih tha (10) October 11, 2021

Mithianghlim Carlo Acutis thuhla theih tha (10)

October 11, 2021

          Carlo Acutis cu Italy mino pakhat a si ih 2006 ih a nunnak a cem. A mah cu 2020, October 10 ah Assisi khuapi ah Mithianghlimih khaisannak rak ngah tu a si. A mah cu kumzabi 21, mino pawl vekin Game lek paih zettu a si. Computer program pawl rak tuah tu a si. Leknak pawl sungin Italy miphun pawl ih duh zet mi bawhlung lek paih tu a si. A mahin Bawipai Thi le Sa Sacramentu a zumnak, a upatnak cu leilungpi hmanih a rak theih pi mi khal a si. Hi ti a si ah cun Mithianghlim Carlo Acutis cu zo a si? Theih cak um zet. Na theih duh mi pawl a thuai lamah ka run tarlang ding.

1. A mah cu 1991, May 1 niah a rak suak. Italy miphun mi a si ko nan London ah a suak. Ziangah tile a nu le pa cu London ih hna an rak tuan laifang a si. A nu le pa cu Andrea Acutis le Antonia Salzano pawl an si ih a mah a suah hnu thla rei lo te ah Milanah an rak thawn.
2. A hoklak lai ah a mah cu Leukemia lungnat nasa zetin a rak tuar. A tuar mi natnak cu Bawi Jesuh hrangah le cu lai ah Pawlpi rak hoha tu cu Pope Benedict XVI a si ih a tuar mi natnak cu Pope le Nu Pawlpi hrangah tumtah in aihram lo ten a rak ap aw.
3. A mah cu cui natnak thawn 2006, October 16 ah a nunnak a rak cem. A mai duhnak vekin Assisi khuapi ah an rak vui. Ziangah tile a mah cu St. Francis Assisi duhdawt in rak upat zettu a si. Mithianghlim pakhat dinhmun ih thok thei dingah a thihhnu kum 8 hrawng ah an rak tuah thok.Mithianghlim ih khaisang thei dingih an rak thawh hi a rang tuk. Ziangah tile a dam laiah a nuncan mi tampi ih an rak theih ruangah a si. Mithianghlim pakhat ih khaisang thei dingah hmaisabik ah ‘Pathian riantu’ (the Servant of God) dinhmun in 2013 ah an rak nehnget. 2018 ah ‘upat tlak’ (Venerable) dinhmun in an rak than bet. Cui hnu ah 2020, October 10 ni ah ‘Blessed’ dinhmun ih rak khaisan a si.
4. A nauhak lai ihsin Pathian cu danglam zetin duhdawt thiamnak thluasuah co tu a si. A nu le pa cu Biaknak lamih zuam tuk cu an si lo. A nu ih simnak vek a si le a fapa ruangah Biakinn a thlen sal nak siar lo hmaisabik Bawipai Thi le Sa sannak, Chrismas tha pek nak, Thitumnak a ngah hnuah Biakinn ih a thlen nawn lo thu a rak sim. Carlo cu a nauhak lai te ihsin Rosary a rak cam theu. Hmaisabik nak Bawipai Thi le Sa a san hnuah Carlo cu nitin ten Missa sumnak ah a rak tel theu. A mah cu Zarhtin ten sualthlahnak Sacramentu a rak sang theu. Mithianghlim pawl ih an rak tlanlennak a thianghlim mi hmun pawl le Bawipai Thi le Sa langnak rak hmuhnak hmun pawlah khawmzawh feh dingin a rak duh zet.
5. Carlo ih zumnak a tum ih a thuk zia cu Biaknak lam ih a rak zuam lo tu a Nu hman Biaknak lam ah a nung ter sal. Ziangah tile a nu le pa, sungkhat unau pawl nitin Missa sumnakih tel dingah a rak sawm thei. A mah rori khal Missa sumnakah zuamnak thawn tel phah in midang pawl khal Bawipai Thi le Sa nitin ten Sang dingih rak thangphawk tu a si.
6. Tlawng pawl ah hmuhsuamnak a tuar tu nauhak pawl humhim tu tiih mi theih tam zet mi a si. A hleice in kutke kim lo pawl a rak humhim theu. A rualpi pakhat ih nu le pa remcang lo in an thenawk le Acutis ih innsungsang sungtel ah cohlang in innsungsang ih nuamnak, duhdawtnak a rak tep ter theu.
7. Computer Programme pawl tuah tu a si. Curuangah Website pawl din in Bawipai Thi le Sa thawn pehpar mi langnak thuhla pawl cat bang lo in a rak tarlang theu. A ca siar tu mipi pawl hnenah ‘Bawipai Thisa, tu le tu kan san le Bawi Jesuh thawn kan bang aw deuhdeuh ding. Hi tiin leitlun ih kan um lai ah Vancungramih nuamnak kan tep cia zo’ tiah a rak simfiang theu.
8. Kumzabi 21 san mino a si vekin video game lek paih zet tu a si. A duh zet mi game cu 2000 kum ah line par ih tarlang mi Playstation le PS2 pawl an si. Cui game a rak lek thokah kumkua(9) lawng a si lai. Game ziangtluk ih a lek duh zet hman ah game lak daan cu Zarhkhat ah nazi pakhat lawng a rak lek theu. Hi vek ih a nemhnget nak cu a nu le pa in daan an tuah sak ruangah a si lo. Sual cawh kuannak tuah dingah le a thinlung uk thei in thlarau lam nunramah thansonak um dingah a si.Cu lawng si lo in a lek duh zet nan a thinlung a rak suup awk.
9. An phum mi a ruak an phork sal ah thu lo le siat lo in a um tiah an sim. An phorh sal ah a ruang a him ko nan mal te hman siat lo cu a si lo. A ruak cu mipi pawl in upatnak pe thei dingah thlalang sungah an ret ding a si. A mah cu Jean bawngbi a hruk ih ‘Nikes’ shoe phanat a hruk. Hi hnipuan hruh daan cu a dam lai ih a duh zet mi hnipuan hruh daan a si.
10. A rothil ih nemhnget thei mi a thinlung rothil ih ret thatnak bawm sungah an ret ih Assisi khuapi ih St. Francis Basilica Biakinnpi ah re in upatnak an pek. A nu in a thih lai ah innsungsang dinhmun in a taksa then pawl a rak pek duh. Asinan, Leukemia natnak ruangah a hlulaknak zungin an rak cohlang duh lo ih an rak vui nak a si thu a sim fiang.

Hi thuthang cu CNA thuthang ih kan ngah mi a si.