Mithianghlim Casimir (1458-1484) March-4

Mithianghlim Casimir (1458-1484) March-4

          Poland ram kilkhawitu Mithianghlim Casimir cu 1458 ah a suak ih a pathum nak Siangpahrang Casimir ih fapa pakhat khal a si. Siangpahrang hauhruang ah fimthiamnak a rak zir ko nain a nunram cu thlacamnak, rawl ulh nak pawl thawn a caan a rak hmang.

          Danglam zet in Bawinu upat a si le Bawinu upat sunloih nak thawn hmin a rak thang zet mi “Mithianghlim Casimir ih hla” (Hymn of St. Casimir) ti mi hla a rak phuah. A tirh sian nak le a tlaitluannak ruangah mi tampi in “mifarah pawl kilkhawitu” tiin an ko.

          1471 ah Hungary ram ih Siangpahrang lukhuh cu an rak ap ih a pa upat tihzah nak thawn a rak cohlang. Ram a uk ding caan ah siangpahrang Fapa pakhat in a mah thawn Siangpahrang hauhruang cuh aw dingah a cak zet mi ralbawi thawn a rak do tum.

          Thi luang mi ralbuainak can ter a duh lo ruangah Poland ram ah a rak relh ih a dik lo mi pawl hrangah ziang tik hmanih hriamhrei tham lo dingah a rak rel cat. Ram uk tu Siangpahrang a pathumnak Fradrid ih a fanu rori in a mah thawn nei aw dingah a rak thleem nain Casimir cun a thianhlimnak cu a cem net tiang a rak kilhim thei.

          1484, a ku 26 ah Mithianghlim Casimir cu a besia zet mi TB nat nak suan a rak tuar. Vila khuapi ih um mi Mithianghlim Stanislas Biakinn ah a nundam sung hmuahhmuah ih a rak sak mi “Bawinui hnenah ni tinten” (Daily Song of Mary) ti mi hla ih cafang a ngan mi ca thawn Mithianghlim Casimir cu an rak phum.

          Mithianghlim Casimir cu Siangpahrang ro co tu ding a si ko nain Baiwnu Maria a duhdawt tuk ruangah cui hlawnthil pawl tanta in Bawinui hla rak phuah tu Mithianghlim a si. Curuangah kan nih khal si nak le hlawnthil pawl tansan in Pathian a duhdawt thei tu kan si thei nak dingah Mithianghlim Casimir kan mah hrangah thla in cam sak aw.