Mithianghlim Cecilia (November-22)

Mithianghlim Cecilia (November-22)

           Awnmawi tumtu pawl a bawm tu le kilkhawitu mi Mithianghlim Cecilia cu Rome khuapi ih si nak nei mi innsang in kumzabi pathum ah a rak suak. Fala Thianghlim nunram thawn kumkhua a nun hmang dingah thukam a tuah ko nain a nu le pa pawl in a duh lo na cing ih an fial nak ruangah si nak nei zet mi Valerian thawn kut an rak sih.

         Thitumnak caanserh an tuah lai ah Cecilia cu a dang ten a to ih a thinlung sungin Pathian Thangthatnak hla a rak sak. Cu ruang khal ah a si neta lam ah awnmawi tum thiam tu pawl ih Mithianghlim ah nemhnget a si nak a si. An mah pawl cu khaan sungih an cawlh ah Vancungmi pakhat cu Cecilia kiangah a ding ih hninsi par le vur par pawl thawn tuah mi sui lukhuh cu a lu par ah a khuh sak rero lai a hmu.

          Cecilia cu a u ih pasal a si mi Valerian ih a naupa Tiburtius khal a nun a rak thleng ter. Kum 192 ah Commodus in Pawlpi a hrem caan ah an unau hnih khal Pagus Tripius tiih kawh mi Rome ihsin kilometer mal te lawng a hlat nak hmun ah Pathian hrangah thah an rak tuar. An thih hnu rei lo te ah Cecilia khal kaih a rak tuar. Siangpahrang Almachius  (Prefect Almachius) ih hmai ah a zumnak cu a dik thu hngetkhoh zet ih a sim hnu ah a hngawng ah voithum vuak a tuar ih a thi zik ten an tan ta.

          A ruak cu St. Caletus ih leihnuai thlaankua ah phum a tuar ih neta lam ah Trastevere ih um St. Cecilia Biakinn ah an thawn. Kum 1599 ah a ruak cu siat lo le thu lo in a it that lai rero vek in hmuh a si. Hi Mithianghlim cu pasal nei hman sehla thianhlimnak thawn Pathian duh nak a thluntu a si vek in kan nih khal nitin kan nunnak ah thianhlimnak thawn Pathian duhnak a thluntu kan si thei nak dingah zuam tlang uh si.

         

Add new comment

9 + 7 =