Mithianghlim Charles Borromeo (November-4)(1538-1584)

Mithianghlim Charles Borromeo (November-4)(1538-1584)

           Puithiam cang tu ding pawl kilkhawitu Mithianghlim Charles Borromeo cu Italy ram, Arona khuate ah 1582 ah a rak suak. A kum 22 ah a pa te Pope Pius a pali nak in Cardinal le Milan khuapi ih Archbishop ah Charles cu tuanvo a rak pek. Trent thurelkhawmnak (Council of Trent) theh tiang a hoha hnu ah thurel nak ih zirh mi pawl zate khal famkim zet ih tuah dingah lam a rak hruai. A mai Diocese sungih um Parish pawl ah a tlawng ih Puithiam pawl cu a man caan ah  mipi pawl Pathian thu zirh dingah thu a rak pek.

           A mah cu a aw a hak ih zamrang ten a sim thei lo nain, a thu sim mi pawl cu man an nei zet. A mah cu Pawlpi ih Biak thawinak cu a upat zet vek in ziang tik hmanah thlacamnak kha rang pi in a cam dah lo. Missa sum lai ah thinlung thu dangdang ka ruat tiin a titu Puithiam hnenah “Missa sumnak tuah dingih na suah hlan ah hnipuan thleng nak khaan ah ziang na tuah, ziang tin tim na tuah,” tiah a rak sut.

           Nunram bang aw mi Bishop pakhat in ziang hnatuan hman a nei lo a ti tikah Charles in cui Bishop hrangah Bishop thawn pehpar mi tuanvo pawl a ngan sak ih pakhat ciar ih dung ah “Bishop pakhat in hnatuan ka nei lo tiah a ti thei maw?” ti mi sim rel nak khal a ngan sak.

           A tuah sak thei mi pawl cu tha zet in hmanhman ih tuah nak ruangah a hnatuan mi pawl zamrang tuk le man hlap tuk si lo in theh dingin a tuah thei. Kum 1576-78 sungih a cang mi Plague pulhnat sungih a neih mi hlawnthil le Pawlpi thilri pawl zuar ih dodal a tuar mi upadi daan pawl ah Puithiam pawl zaten khahmul met dingah le a tlak lo mi le a kaih lo mi Puithiam pawl suah a tul thu khal a tel.

           Nikhat ah Pathian Biaknak khaan ih thla a cam lai ah a dodal tu Puithiam pakhat in methal thawn a rak kah. Asinain, cerek in a hnipuan a ngah ko nain, a taksa cu hraimhma pakhat hman a um lo thu mangbang zet in an rak hmu. Charles cu a kum 46, 1584 ah Arona khuapi ah a rak thi. Hi mi Mithianghlim bangin mai cin le daan a upat tu le a thlun tu kan si ve thei nak dingah a hnenah thlaza cam tlang uh si.