Mithianghlim Charles Lwanga le a rualpi pawl (June-3)

Mithianghlim Charles Lwanga le a rualpi pawl (June-3)

          Mithianghlim Lwanga le a rualpi 21 cu Ugandan ih martyr tiih upat mi an si. Kum 1870 ah Europe mi Puithiam pawl cui khuapi ah an thleng ih Siangpahrang Mtesa ih san lai ah Pathian thu sim nak cu man a nei zet. Asinan, kum 1885 ah Siangpahrang Mwanga ih ram a uk lai ah a miphun kar lakah Christian zumnak um lo dingah a rak rel cat. A thu hrampi cu Siangpahrang Pa in nunau le nunau, mipa le mipa ngai zawn awk nak pawl cu vek ih ziaza sia pawl thlun dingah Christian tlangval pawl in an el ruangah a thin a heng.

Kum thum a rei mi hremnak a tuar tu pawl cu Bawi upa a si mi Charles Lwanga le a dang a rualpi 21 tla an tel ve. An zaten Siangpahrang inn in a suh tikah an zaten “kan thih tiang” tiah aw khat in an hun aw tlang. Mi hrakkhat cu Siangpahrang hmai ah lu tan an tuar ih midang cu an hngawng ah fei thawn an khawh that.

A dang a taang lai mi pawl cu peng 37 a hlat nak hmun ih hrem nak hmunah an hruai. An mah sungin pathum cu lamzin ah thah an tuar ih a dang dam ciing ih a taang tu pawl cu hri thawn an teen ih meisa thawn an ur. Tlangval pakhat cu thu nei zet tu a pa ih thupek vek in a hngawng ah voikhat an dawt ih a rak thi. Ugandan ih martyr pawl zaten Pathian hmin kop hah in an nunnak an rak liam.

       Cu le “Myrtyr pawl ih thi cu Christian pawl ih thlaici a si,” ti mi Tertullian ih a tong mi cu thu hman ah a rak cang. Thah an tuar kum ah Baganda pawl kar lak ah Christian pawl cu 200-500 tiang rori an karh zai ih pawlpi sung lut dingih Pathian thu zir tu cu 800-3000 tiang an rak karh.

           St. Charles Lwanga cu African mino pawl kilkhawitu mithianghlim a si. A rualpi pawl thawn Siangpahrang thil tha lo a tuah mi an dodal nak in hrem nak le thah nak a rak tuar tu an si. Thu hman ruangih mi raltha an rak si. An mai hi ti vek ih martyr an rak tuar ruangah Jesuh Khrih le pawlpi hrangah teetti tha zet ah an rak si.

Kan nih khal kan kiang kan kap ah thu dik a din pi ngam tu kan si ve cio nak dingah mithianghlim Charles Lwanga le a rualpi pawl hnenah thla in cam sak aw tiah zaangfah bom nak dil dil tlang uh si. Mithianghlim thu kan thei nak in an nun can ziazatha pawl pakhat te tal thlun ve tum tlang uh si.