Mithianghlim Dominic (August-8)

Mithianghlim Dominic (August-8)

Ordo Praedicatorum a tin kaing rak dintu Mithianghlim Dominic cu kum 1170 ah Spain ram, Calaroga khuapi ah a rak suak. Puithiam cannak a ngah hnuah Psma khua ih Cathedral ah tuanvo an rak pek. Cui hmun ah St. Augustine ih daan pawl a rak thlun.

          Kum 1204, ih Denmark ih a feh phah ah Taulous khuapi ih Hotel nei tu ih nunnak  rak thleng ter thei. Curuangah Dominic cun Pathian thuthangtha sim nak cu a that ho ter tu a thupi bik mi thil pakhat a si thu a rak hmu fiang. Cui hnu ah France ram, thlanglam ih thanso nak lam a pan rero mi France Albigenses cu that nak lam ih thleng dingah an rak thlah.

          Kum reipi nasa tak ihPathian thu a sim nak siseh, a thianghlim zet mi nunram ih teette pawl ruangah si she, mitampi Catholic ah an kir sal. Ruah nak hman lo pawl do nak ah hlawhtlinnak a hmu lo mi Citeaux khuapi ih Yatih pawl cu amah in “Naam ai ah thlacam nak thawn nan mah le nan mah hriamhrei bun aw uh. A tha zet mi sinfen pawl ai ah tangdor nak hruk uh,” tiah a rak sim.

          Nikhat ah a tha zet mi a thu sim mi cu khui tawk cauk in na zingzoi tiih an suh tikah a nih in, “Duhdawtnak cauk lo ziang cauk ta in hman a si lo, “ tiah a rak sim.

          A mah cu Pathian hnatuan tu mal te thawn Taulous khuapi ah Praedicatorum a tin kaing a rak din. A pawlkom sungtel pawl cu a sunglawi zet mi ca zingzoi nak le Pathian thu sim nak pawl tuah in a rak ap aw.

          An mah pawl mi tampi theih ih lungkim pi nak cu kum 1216 ah an rak ngah. Dominic in a unau pawl cu Pathian ih thuhla a si lo le Pathian thawn lawng biakawk dingah ruahnak a rak pek theu.

          A mah cu Fala Thianghlim Bawinu Maria sunlawih nak ah a mawi zet mi thlacam nak a si mi Rosary a rak hmang thil tu a si. Kum 1217 ah Bawinu vancungram ih hruai nak a ngah nak Puaini ah Dominican sungtel pawl cu hmun tin ah thlah in “Kan thlaici re men lo in vorh tlang uh si,” tiah a rak sim.

          A mah cu Bologna khuapi ih a um hlan ah Rome khuapi ah kum rei lo te sung a rak um. Harsa zet ih Pathian hna a tuan nak ruangah a tha a cem tuk ih a kum 52 ah Bologna khuapi ah a nunnak a rak cem.

          A tanglam ah Mithianghlim Dominic hnen ih Bawinu Maria in Rosary ih thathnem nak 15 kan run tarlang ding.

1. Rosary thlacam nak in keimah upat nak i pe tu pawl hnenah thluasuah a hleice in ka burh ding.
2. Rosary thla a cam tu pawl ka humhim ding.
3. Rosary in hell ram ihsin humhimnak hriam nam pakhat a cang ter dingih a dang sual nak phunkim khal in ka luat ter ding.
4. Ziaza mawi thawn ka thang ter dingih thlarau hrangah a famkim mi zaangfah lainat nak ka ngah ter ding.
5. Rosary thlacam nak thawn ka hnenih ap mi thlarau pawl cu siatral nak in an luat ding.
6. Thuthuk pawl tha ten ruat phah in Rosary a cam tu pawl cu thih sia in an thi lo ding.
7. Zumnak thawn Rosary a cam tu pawl cu Sacramentu pawl sang ta lo in an thi lo ding.
8. Thinlung tak thawn Rosary thla a cam tu pawl cu an nun lai ah siseh, an thih hnu ah siseh, Pathian ih tleu nak hnuaiah thluasuah an ngah ding a si.
9. Rosary thla a cam tu pawl cu hell ram te in ka run ding.
10. Rosary thla a cam tu pawl cu Vancungram ah si nak sangpi an co ding.
11. Rosary thlacam nak in dil mi thluasuah zaten an ngah ding.
12. Rosary a karhzai ter tu pawl hnenah an tul sam mi thluasuah ka pe ding.
13. Rosary cam tu pawl hrangah an nun lai ah siseh, an thih hnu khal ah siseh vancung ih a um mi Mithianghlim pawl lungkim pi nak ka dil sak ding.
14. Rosary thla a cam tu pawl zaten ka fanu le ka fapa an si ih Jesuh khrih ih unau khal an si.
15. Rosary cam nak ih thathnem nak pawl cu neh hnu san khal ah thluasuah pawl ngah nak ih hmin sinnak a si.