Mithianghlim Dungthluntu Bartholomew (August-24)

Mithianghlim Dungthluntu Bartholomew (August-24)

          Mithianghlim Bartholomew ti mi Nathanael cu Galile ram Kanan khuapi ah a rak suak. Dungthluntu lak in a thinlung tlaitluang zet mi a si ruangah hminthang zet mi a rak si.

          Dungthluntu Phillip in Nazaret khua ah rundamtu Bawi Jesuh a hmuh thu a sim tikah Bartholomew in, "Nazaret in thil tha a suak thei maw?" tiah a rak sut.

          Nazaret cu khuate pakhat a si ih ziang thuhla hman a rak um dah lo. Jesuh cu cuih thuhla a theih tikah a lungkim tuk ih, "Israel mi taktak hi zoh hnik uh! A thinlung ah ziang hrawhhrol nak hman a um lo," tiih a rak ti mi cu Jn 1:47 sungah fiangzet in kan hmu thei a si.

          Hlanlai cangan thiamtu pawl ih an rak ti vek in a mah cu Amagnia le India pawl ah Pathian thuthangtha a rak sim ih minung tampi cu milem biak nak in Catholic biak nak ah an rak thawn.

          Hlanlai dan in a mah cu a vun an rak hawk. A vun pawl cu sau zet in an tan ih an hlon. A lu an tan hlan ah nat nak reipi a rak tuar a si.