Mithianghlim Frances Xavier Cabrini (November 13)

Mithianghlim Frances Xavier Cabrini (1850-1917)

November 13

          Khuadang dang ih a vai tu pawl a kilkhawi tu Mithianghlim Frances Xavier Cabrini cu Italy ram, Sant’ Angelo Lodigiano ah 1850 ah a rak suak. A nauhak lai te ah Sr. kaing tampi ah luh a rak dil nain, harhdamnak lam ih a tlak sam ruangah luh an rak on lo.

          Curuangah 1877 ah Lodi khuapi ih Bishop in a hnenah “ziang a tin kaing hman in an lo cohlang lo le kaing thar pakhat din aw,” tiah a rak sim.

          Cui tongkam thawn kaih in Frances in mino pawl fimthiamnak zirh ding tumtah nak thawn “Thianghlim Thinlung ih Pathian hnatuantu Sr. pawlkom” (The Congregation of the Missionary Sisters of the Sacred Heart) cu Codogno, Milan le Rome khuapi pawl ah a rak din.

          Kum hra a rei hnu ah Frances cu Pope Leo hleithum nak ih forhfialnak thawn America ah a feh. A mah cu America ah a vai mi Italy miphun pawl karlak ih hnatuan dingah America ram ih an vaih nak a si.

          New York ih  a thlen tikah Bishop in kir sal dingih a sim tikah a nih in, “Pope in hi tawk ih i thlah ruangah hi tawk ih ka um a tul,” tiah a rak let.

          A mah cu tikcu caan tawite sungah Pawlpi tlawng pawl, sizung pawl le nu le pa nei lo pawl ih inn a din thei ih hlei ah kawh nak thar pawlkom thar tampi khal a rak cohlang thei.

          Mirang ca le mirang tong zir nak ah harsatnak tampi um dingin a tumtah mi cu ziang tik hman ih hngilh lo nak le tanta nak um lo ih hlei ah khuakhat hnu khuakhat ih a vai tu pawl le ram nei tu America miphun pawl karlak ah dungthluntu hnatuannak ah a hlawhtling zet.

          Mother Frances Xavier Cabrini cu 1917 ah a rak thi. A ruak cu New York khuapi ih um Fort Washington ah upat nak pek in ret that a si.

          Mivai le ramdang ih a um tu pawl kilkhawitu Mithianghlim a si vek in kan nih khal kan feh nak hmun tin ah in kilkhawi ve aw tiah zaangfah bom nak diltlang uh si.