Mithianghlim Francis Assisi ih thuanthutawi relnak

Mithianghlim Francis Assisi ih thuanthutawi relnak

Mithianghlim Francis Assisi ih thuanthu tawi (1182 - 1229)

Siangbawi tlawng rak dintu mithianghlim Francis cu kum (1182) kum Italy ram ih um Assisi khua ah a rak suak. Kum (1201) ah Francis cu raldo nak ah a feh ih khatlam ral pawl in an kaih ih thawng an rak  thlak. Kum khat a rei hnu ah thawng inn in a suak ih inn ah a tlungsal. Ralbawi si duh ah raldo nakih feh a tum sal. Asinan lamzin a feh laiah aw pakhat in a nun nakah na zirding mi le a tuah ding mi sim nak aw a rak thei. Inn a thlen hnu ah Francis in a man nei zet le man khung zet mi, paisa hman ih lei theih lo mi, a can sunglawi zet cu man lo men ih a rak hman kha a vungthei aw duk di. Cui hnu in a nun nak cu Pathian hrangih hmang dingah a ap.

Cui hlei ah a hni puan pawl le a paisa pawl khal mifarah pawl a pek theh. Curuangah a pa cu a thin heng tuk ih a neih mi a thilri hmuahhmuah a dil thluh sal. Francis khal in Bishop tlawnghmaiah a hnipuan a hlit ih “Hi hnipuan pawl hi ka pai ta hlir an si, a hlan ah cun ka Pa cu leitlun ih ka Pa tiah ka ko, asinan tuah cun vancung ih um mi ka Pa lawng ka ko thlang ding” tiah a rak ti. Francis cu mi dang pawl hnen ih dil cawp mi hni puan tha lo a hruk ih a tai ah hridai thawn a tawn. Cui hlei ah kedam hruk lo in thla cam nak le sual thlah nak in a nun a rak thok sal. Kum hra a rei hnu ah mi pa (5,000) in Francis ih hni puan cu an rak hruk ve.

Ziangah tile Francis ih angki cu sui ih tuah mi kawr hnak in a sunglawi sawn ruangah a si. A tlu thlang ding mi Pawlpi bawm rero tu Francis cu a mang ih a hmuh mi a pa thum nak Pope Innocent cu kum (1210) ah Friar Minor tlawng rak din tu a si. Francis in Deacon a ngah hnu ah sair cawk lo mangbang za a rak tuah. A mah cu Pathian thu thawn peh par mi farah nak le duhdawt nak timi tahthim nak thawn Pawlpi a rak din sal. Tisa lam ih sualsawm nak a phun phun do dingah tlawngpit can ah hni puan tel lo in hling lak ah a feh ih thla tangcanah a dai zet mi vur lak ah a to.

 A feh nak saklam Africa ih um Muslims pawl lak ah a zum nak a rak hmuh. Christmas can Bawi Jesuh a suah nak caw rawl kuang tuah mi duhnung zet mi ziaza cu Grechio  khuaah Francis in a rak tuah thok. Francis cu “Lady poverty” ih ralbawi a si nan, ei ding rawl khal mi hnen in a dil. Francis cu a feh nak tinkim ah midang pawl thawn an elawk ih Francis in an sual sir in Pathian hnen ih kirsal dingah a fial. Cui hnu  reiloteah minung tampi in Francis in Pathian ziangtluk in a duhdawt ih, Pathian thawn ziangtluk  in an naih awk ti an thei ih a dung an thlun. An mah cu khui tawk hmun khalah mi farah pawl, le mi naa pawl hnen ah Pathian thu an sim. Mithianghlim Francia cu Bible ih zirh dan vek inle Pathian nun dan vek ih nung ve dingah a rak zuam. Sersiam mi hmuahhmuah tlun ih a duhdawt nak ruangah Pathian in Francis ih a kut, a kee le a kiangkap ih a hriamhma pawl a pek. Hi mi cu kum (1224) Francis a thih hlan kum hnih duh ih thil cang mi a si. Francis cu a kum (44) ah Porziuncola khua pi ah a nun nak a rak cem. July 16, kum (1228) ah Pope Gregory IX in Francis cu mi thianghlim ah a run nem hnget.

Mithianghlim Francis cu leitlun thilri pawl in thin lung diriam nak le  nuam nak in pek lo ti mi hminsin nak thawn a nun nak a rak hmang. A dik mi nom nak cu Pathian kan duhdawt nak in le a mah Bawi Jesuh hnen ih kan hlan awk nak in a ra a si tiah Francis in in sim a si.

Bible thawn in ziangtin kan nung ding tile ziang vek lunglawm nak thawn kan nungding ti kha mithianghlim Francis in lam in hmuh ih in zirh a si.   

St.Francis in hi tin thla a rak cam theu.

          Maw Bawipa, na daih nak ih hman-rua in si ter hram aw.

Huatawk nak um nak hmunah duhdawt nak ci tuh tuah tuahmawh nak hmunah ngai dam tu in si ter hram aw.

Rinhlel nak hmunah zumnakah siseh, beidon nak hmunah ruahsan nak in siseh, thimnak hmunah tleunak le ruiahsiat nak hmunah lungawi nak thlen ter tu in si ter hram aw.

Maw Bawipa, hnem nak hawltu si lo in mi hnemtu ah siseh, theihthiam mi si lo in mithei thiam tu le duhdawt mi silo in miduhdaw tu in siter hram aw.

Ziangah tile, pek nak in pek kan si ih mingai dam nakin ngaihdam kan si.

Cun thih nakin kumkhua nunnakah hrin thar mi kan si. Amen.