Mithianghlim Ignatius of Antioch (October-17)

Mithianghlim Ignatius of Antioch (October-17)

Antioch khua ih Mithianghlim a si mi Bishop Ignatius cu Cathianghlim ngantu Mithianghlim John ih kuthnuai a si.

A mah cu Mithianghlim Peter hnenin Bishop a rak ngah ih cawn tlak zet mi Bishop pakhat in kum 44 luan tiang a nun a rak hmang.

          Trajan Siangpahrang ih a hrem caan ah sahrang rawl ah an kaih ih Rome khuapi ah an rak kuat. A  nun sungah a mai pawlkom sungtel a unau pawl ih um nak cu a hnget khoh ter ih hminthang zet mi caa pasarih a rak ngan.

          Thuthantu pawl in lethmat an tthu ih thawngkinn in luat dingih tawlrel sak tu Rome khuapi ih Christian zumtu pawl hnenah “Hi sahrang pawl cu Bawi Jesuh hnen ka thlen nak ding lamzin an si ruangah an rawl ka si ko. Kei cu Pathian ih sangvut ka si ruangah hi sahrang pawl ih ha in ei ka tuar ding. Cu lawng ah Bawi Jesuh ih a thianghlim mi rawl ka cang ding,” tiah a rak ngan.

          Kum 107 ah Rome khua ih a thlen hnu ah hremnak le thah tuar dingah Colisrum ah an kuat. Ni reipi rawl lo ih ret mi tih nung zet mi sahrang pahnih in rei lo te ah an ei. A tang mi a ruh mal te cu Rome khuapi ah man nei zet mi a ro ah tu tiang an ret ih an upat a si.