Mithianghlim Irenaeus (June 28)

Mithianghlim Irenaeus (June 28)

            Lyons khuapi ih Bishop, Mithianghlim Irenaeus cu kum 130 ah Asia Minor ah a rak suak. A mah cu Smynor khuapi ih Bishop Mithianghlim Polycarp ih dungthluntu le Cathianghlim ngantu Mithianghlim John ih a dungthluntu ah a rak cang. A cang thei mi cu Mithianghlim Polycarp in France ram ah Pathian hnatuan dingah a thlah ih France ram ah Puithiam cannak a rak ngah.

          Kum 177 ah France ram ah zumnak lam ih thuel awknak a rak um ih Lyon khuapi ih Bishop tla thah a rak tuar. Cui caan hrawngah Irenaeus cu Rome ih a um caan a si ruangah a rak luat. A thlen sal ah cu hremnak a reh zo ih Lyon khuapi ih mipi pawl ih lungkimnak in Bishop ah an rak hril.

          Irenaeus cu Tuukhaaltu hnatuan tha zet ih a tuan lawng si loin a innhnen pawl Pathian thuthangtha sim dingah zuam zet in a rak tuan. A hmin cu Greek tongin, “Remdaihnak,” ti duhsan a nei ih a hmin vek in el awk nak pawl cu a rak rem tha sal. Kum 190 ah, Pope a pathum nak Victor thawn Pasca Puai ni cu Judah miphun pawl ih dodal nak a tuar tu Asia Minor ih um Christian pawl cu a rem aw ter sal.

          A tongkam le a ngan mi pawl cu kan mah rori ih kan theih lawng ah kan zum ding tiih ruah nak a nei tu pawl a rak dodal. “Pathian thei lo tu pawl do nak le dungthluntu pawl ih thu zirh mi pawl ih tette,” timi cauk pawl cu zoh mawi ih a um nak le hnih suah sai phah ih thu a sim fiang nak pawl thawn Catholic Pawlpi ih zum nak cu a rek humhim. A mah cu Settimius Separus Pawlpi hrem nak caan kum 202 ah thah a rak tuar.