Mithianghlim Jerome Emiliani (1481-1537) (February-8)

Mithianghlim Jerome Emiliani

(1481-1537) (February-8)

          Somaschan Puithiam pawl (Somaschan Fathers) ti mi a tinkaing a rak din tu Mithianghlim Jerome Emiliani cu Italy ram, Venice khuapi ah 1481 ah a rak suak.

          Thil ti thei nak fam kim nei mi ralbawi pakhat a si ih Treviso khuapi kiang ih um Castelnuovo ah ralbawi ah tuanvo pek mi a si. Cui khuapi ral kut sung ih a thlen hnu ah thawng ah hridai pawl thawn an rak teen.

          Thawnginn sungah thluasuah a um lo mi nunram a rak ruat thei. Bawinu Maria ih bawm nak ruangah mangbang zet in thawng sungih a luat hnu ah Pathian hnenah a mah le a mah ap aw dingah a rak bot cat.

          Mithianghlim Jerome cu a kum 37 ah Puithiam cannak a rak ngah ih a neih mi hlawnthil pawl cu mifarah pawl a rak pek. Nu le Pa nei lo mi nauhak tlawng pawl, sizung pawl le a sir aw mi nunau tha lo pawl hrangah um nak inn pawl a rak sak sak.

          Kum 1532 ah Milan khuapi thawn a nai mi khuapi pakhat a si mi Somaschi khuapi ih Puithiam pawl kaing a rak din. An kaing ih tumtah mi cu nu le pa nei lo mi nauhak pawl kilkhawi dingah mino pawl fimthiamnak zirh dingah le Puithiam nauhak deuh pawl lamhmuh dingah a si.

          Mithianghlim Jerome in Puithiam pawl a rak sim mi cu “Jesuh Khrih cu farah nak, beidon nak, hnon tuar nak, thinnuam lo nak le mipi ih rel siat nak pawl tuar ter dingah hriakculh nak ka rak lo pek.

          Pathian pakhat lawng ih harsatnak pawl ih thuhla theih a ngah ko nain, ka theih mi pathum a um lai. Pakhat nak ah: Pathian in a duhdawt mi a Fa le pawl sungih a lo tel ter duh ruangah hi vek ti daan pawl hmangin a thianghlim ter.

          Pahnih nak: Pathian in nan nih cu a mah siar lo zo hman a lo zum ter duh lo. Pathum nak cu Pathian in meisa sungih Sui vek in nan nih tla a lo thlingthla.

          Hi vek harsatnak pawl ton caan ah zumnak a hngetkhoh ah cun Pathian in na hrangah hnangam daih nak thluasuah cu hi leitlun lawngah si lo in neta khal ah a lo pek ringring ding.

          Kum 1537 ah sungdok le luak nak ih thih nak suan awk nat nak pawl a rak bawm ih nat suan a rak tuar ih a rak thi. 1928 ah Pope Pius 11 nak, Mithianghlim Jerome Emiliani pawl cu nu le pa nei lo tu nauhak pawl humhim tu Mithianghlim pawl tiin an run ko lan ta.