Mithianghlim John the Baptist (August-29)

Mithianghlim John the Baptist (August-29)

Bawi Jesuh ih unau a si mi Mithianghlim John the Baptist cu Judia ram ih Zachariah le Elizabeth te ih fa a si. A kum 30 hrawngah rundam tu Messiah a rat ding hrang rak man cia dingah Jordan Tiva ih nelrawn ah Pathian thu a rak sim.

          Pathian thu sim ding a tuanvo cu Bawi Jesuh tihnimnak a lak hnu lam ah a theh. Cui hnu ah Herod in a nau ih a nupi Herodias thawn an thit awk thu a hman lo tiih a sim ruangah kaih a tuar. Cui hnu in Herodias in John that ding caan tha a hngak.

 Herodias in Herod Siangpahrang ih suah ni puai ah caan remcang a tuah. Cui puai ni ah Herodias ih fanu Salumay ih a laam thiam nak ruangah Herod Siangpahrang in na duh mi hmuahhmuah in dil aw; ka ram hrekkhat tiang ka lo pek ding tiah thu a kam.

          Salumay khal cun a nu ih fial vek in John ih lu cu pakaan dau par ah re in a hnen ih pe dingah a dil. Siangpahrang Bawipa cu a thin nuam lo tuk nain a mikhual pawl hmai a si ruangah a lungkim.

Cui hnu ah John ih lu cu pakaan dau in an rak keng ih Salumay an pek. A nih in cui lu cu a nu hnenah a pek bet. Cui hnu rei lo te ah John ih dungthluntu pawl in John ih a ruang cu an lak ih an phum.

Mithianghlim John the Baptist ih lutan a tuar nak kan zoh tikah Herodias ih mai hrang nuamnak le si nak duh nak ruangah le duhhamnak ruangah John the Baptist cu lutan nak a rak tuar a si.

Kan nitin nun vun zoh sal uh si. Mai duhhamnak, hamtamnak le si nak duh ruangah kan kiang kan kap hi harsat nak kan pek ih kan tong ter ti ruah ding tampi a um a si. Cun thudik hman ruangih thih nak a tuar tu St. John the Baptist ih nun cu kan Christian nunah hin kan neih tul mi pakhat a si. Nitin kan nunnak ah thudik thu hman thawn a nung thei ve tu kan si thei nak dingah St. John the Baptist ih nun cawng tlang uh si.