Mithianghlim John Chrysostom ih Thuanthu tawi (September 13)

 

Mithianghlim John Chrysostom ih Thuanthu tawi (September-13)

            Pathian thu sim tu saya pawl kilkhawi tu mithianghlim John Chrysostom cu kum (357) ah Turkey ram Antioch khua ah a rak suak. Pathian thu a sim mi a tha tuk ruangah Chrysostom (Sui kaa) tin hmin an rak pek. Tongkam thiam zet tu Libanius hnen in thu sim daan ding a rak zir theh hnu ah a thiam zet mi thuthentu si dingih tumtah nak nei tu a si. Asinan, a kum (18) ah Antioch Bishop Melitius ruangah a thinlung a rak thleng ih Siangbawi pakhat cang dingah a rak rel cat. Kum (386) ah Siangbawi a rak ngah ih kum (398) ah Constantinople khua ah Bishop a rak tuan. A mah cu mifarah pawl sumpai lam in rak bawm tu khal a si. Cu lawng si lo in tongkam in siseh, Siangbawi pawl nuncan ziaza that nak ding tuanvo a rak lak.

            Dik zet le fiang zet ih a thu sim nak in hmin that nak a rak ngah ter. Kum (403) ah Siangpahrang Bawinu Eudoxia cu Jesebel tin an kawh ruangah thu buai nak a suak ih Bethania ram ah an rak dawi. Ni rei lo te ah Constantinople khuapi ih a rak cang mi linghnin cu Pathian ih hrem nak tin an ruat ih John kha zamrang ten an ko. Cui hnu kumkhat a rei ah Biakinn hmai ih an phun mi Siangpahrang Bawinu ih Ngun milem a duh lo thu a rel ruang ah dawi a tuar la la.

            Mithianghlim John Chrysostom cu a hraang zet mi kil tu pawl ih hrem nak le ram dawi nak ih harsat nak ruangah kum (407) ah a nun nak a cem. A ruang cu Constantinople khua ih um dungthluntu pawl ih tlawng ah an rak phum.

 

Add new comment

2 + 12 =