Mithianghlim Maximilian Kolbe ih thuanthu tawi (August-14)

Mithianghlim Maximilian Kolbe (August-14)

        Auschurtz ih martyr, Mithianghlim Maximilian Kolbe cu1894 , January 8 ah Poland ram ah a rak suak. A nauhak lai te ah Bawinu Maria a mah rori in lang nak a rak hmuh ih Bawinui kut sungih pangpar pahnih sungin pakhat hril dingah a rak dil.

          Pakhat cu a raang a si ih thianhlim nak siseh, a dang pakhat cu a sen a siih martyr si nak siseh hmin a nei. Maximilian in a pahnih ih ka hril tiah a rak ti.

          Franciscan a tin kaing sungih a thlen hnu ah Theology zir nak famkim dingah Rome ah a rak feh. Puithiam cannak a ngah nak ding kum hnih a duh nak kum 1917 ah sual hram nei lo mi Bawinu ih mi raltha pawl (Militia of Mary Immaculate) a rak din.

          Karakow khuapi ah a feh sal ih kum 1927 ah ‘the City of the Immaculate’ Biaknak lam thawn pehpar mi cauk zem nak ih a tel tu Puithiam 800 lenglo thawn an rak ong.

 An magazine a si mi “Sual hram nei lo mi Bawinu ih mi raltha pawl” (Knights of Mary Immaculate) cu hnah taan khat tiang a rak karh.

          Kum 1930 ah Maximilian cu Japan ah kum rei lo te sung a feh ih cui hmun ah “sual hram nei lo mi hmuan” (the Garden of the Immaculate Conception) cu hlawhtling zet in a rak din suak thei.

          A voihnih nak leitlun ralpi a thawh lai ah Maximilian cu Jew miphun le mi harsa pawl bawm dingah tha tho ten a rak tuan.

          Kum 1941 ah Hittala ih an thuh mi ralkap Gestapo in a mah cu a rak hawl ih Auschurtz ram ih thawng ah  ram sinakin dawi nak a rak tong. July 31 ih a rak luat tu thawngtla pa pakhat hrangih leh rulh nak ih an hril mi minung pahra pawl cu khaan fate sungah rawl lo in an thih ter.

          Fr. Kolbe in cui pahra sung in Francisca le Joseph hmin nei tu nauhak pahnih ih pa ai ah a mah le a mah a rak ap aw. Zarhhnih sung rawl lo in ril rawn nak a tuar hnu ah August 14 ah Fr. Kolbe cu carbolic acid dawh nak in a rak thi. A mah cu Bawinu ih hmin sunglawi cu ko phah in hnangam ten a rak cawl.

          Hi Mithianghlim kan zoh tikah a Pathian duh nak ah ziang dang hman ruat thei lo zaan a mang ih a ken mi hninsi par a raang le a sen, thianghlim nak le thisen luan nak a si tin Bawinu in a rak dil nak pakhat hman pe siang lo in a mah rori in tuan suak dingah le tuah suak dingah tumtah nak a rak neih bangin kan nih khal a mah bangin Pathian hrangih tuah suak duh nak thinlung kan neih thei nak dingah zaangfah dil tlang uh si.