Mithianghlim Monica ih Thuanthu Tawi

Mithianghlim Monica Puai (27th August)

Mithianghlim Augustine ih nu a si mi Mithianghlim Monica cu Tagaste ti mi khua Africa thlang lamah kum 332 ah a rak suak. Amah cu Chrihtian inn sungsang tha ih a thanglian mi a si. A pasal cu Pathian thei lo mi Patricius a si. A pasal in harsat nak tam pi a pe theu. A si nan monica cun ning zet hmansehla thin sau zetin thla a cam sak theu. Cuti cun a pasal ih nun nak a cem zik lam ah Monica in a thlacam nak ih a rah, a hmu sal. A pasal Patricius cu kum 370 ah Khrihtian zumnak a cohlang ih a pom thei sal. Kum khat a rei hnuah a ih khun parah Baptism nak a rak sang. A pasal ih nu khal Khrihtian ah a rung cang ta.

A fapa Augustine cu thil tha lo thawn a rak nungcangih Pathian lam khal a thei nawn lo. Monica cu a fapa hrangah ulh nak le mitthli thawn thla a cam theu. A nu in Puithiam pakhat a ko sakih a biak ter sinan, Augustine cun a lung duh lo. A mai nun can thatlo hi a thlah duh lo. Monica khal cun a fapa hrangah pakhat hman a thlah ve lo.

Augustine cu Rome ah a fehih a nu in a fapa ih  theih lo dingin a dungin a rak thlun. Monica cu a fapa hrangah thlacam a pelh dah lo. Kum tampi mitthli thawn thla a cam hnuah Augustine cu a nuncan a run thleng sal. Cuti cun Khrihtian men men lawng si lo in Siangbawi tiang a run tuanih neta ah cun Bishop a cangih hmingthang zet mi ca ngan thiam tu le hmin nei zet mi mithianghlimah a rung cang a si.

Hi puai cu Mithianghlim monica puai ih a thaisunah hman a si theu. Mithianghlim Monica cu kum 387 ah Ostia ah a thi. A fapa cu a nu a thi zikah a nui kiangah a um a si. Mithianghlim Monica cu khrihtian inn sang nu le innsang nei mi nu pawl ih zoh thim tlak mi nu a si.

Kan thlacam mi a phi kan ngah lo tikah beidong ding kan si lo. Mithianghlim Monica vekin thla kan cam ring ring ding a tul a si. Jesuh Khrih ih in zirh bangin zuam nak thawn ngah lai hlan lo kan dil a si ahcun kan ngah ding a si ti cu Mithianghlim Monica ih nun zia kan zoh tikah kan hmu thei a si.

Mithianghlim Monica bangin kan innsungsang le kan fa le pawl hrangah tawp ni nei lo in a bik in Nu pawl thlacam kan zuam ding a tul a si. Amah bangin zumnak a khoh mi kan si thei nak ding khalah zuam cio uh si.

#rvafalam #dailysaint #stmonica