Mithianghlim Padre Pio of Pietrelcina ih thuanthu tawi rel nak (September 23)

Mithianghlim Padre Pio Pietrelcina (1887-1968)

September-23

 

          Mithianghlim Padre Pio cu May 25, 1887 ah Italy ram, Francesco Forgione ah a rak suak. A pa cu Guiseppa a si ih a nu cu Grazio a si. A pa cu a sungkua pawl cawm dingah New York ih um Jamaica khuapi ah hna a rak tuan.

          Francesco cu a kum hleinga ah Capuchin ah a rak lut ih Pio ti mi hmin a rak lak. Kum 1910 ah Puithiam cannak a ngah ih leitlunhuap ralpi a thawh voikhat nak ah hnatuan hleicee a rak tuan.

          TB nat a ngah hnu ah a mah cu an cawl ter. Kum 1919 ah Adriatic ih um Bari khuapi in peng 75 a hlat nak hmun, San Giovanni Rotondo ah Catholic Puithiam pawl um nak hmun ah a cawl.

          September 20, 1918 ah Mass raithawinak theh hnu Pathian hnen lungawi thu a sim lai ah Padre Pio in Bawi Jesuh ih lang nak a rak hmu. Lang nak a hmuh hnu Bawi Jesuh an khen nak Thinglamtah tumpi hnuai ah thlacam dingih khuk a bil lai ah Padre Pio in mangbangza a si mi Bawi Jesh ih a rak tuar mi hriamhma pawl cu a kut, a ke le a hnak pawl ah a rak tuar.  

          Cu mi hnu cun a nunram a hnok deuhdeuh. Siivai lam ih Doctor pawl, Biak nak lam thuneitu pawl le thuduh pawl in Padre Pio tong dingah a hnenah an feh.

          Kum 1924 le 1931 ah Bawi Jesuih hriamhma a tuar nak thuhman pawl an rak sut. Padre Pio cu mipi hmai ih Missa raithawinak tuah le sualthlah ngai nak pawl tuah an on lo.

          Rei lo te ih a reh cih ding mi hi thu bohcat nak pawl cu phunzai lo ten a rak tuar. Cu vek in, 1924 hnu cun ziang ca hman a ngan nawn lo.

A dang a rak ngan mi ‘Bawi Jesuh ih harsat a tuar nak thu’ cu 1924 hlan ah a rak ngan theh. Padre Pio cu Bawi Jesuih hriamhma a ngah hnu a um nak Puithiam tlawng in a pot dah lo. Asinain, a mah tong dingah mipi pawl an feh theu.

          Biakinn ah mipi pawl thawn zingtin nazi panga ih an tuah mi Missa theh in sun tiang sualthlah ngai nak a tuah sak. Sun in cu mina pawl thluasuah pek dingah le a mah a tong duh tu pawl hrangah caan a rak pek.

          Zaanlam tinten sualthlah nak a rak tuah sak theu. Nikhat ah sualthlah nak hrangah nazi pahra tikcu a pek.

September 21, 1968 ah a thi ih 1999 ah Mithianghlim ih nemhnget dingah an thok. Pope John Paul a pahnih nak in June 16, 2002 ah Mithianghlim ah a rak nemhnget.

          Mina tampi thla a cam sak nak in an dam. Rawlulhnak a tuah ih pawnghmuk, sang, tidai le cencerh pawl lawng ei in a rak um.

          Mithianghlim Padre Pio cu Pathian a duhtuk nak ah Bawi Jesuih hriamhma panga ngahtu a si. Curuangah Bawipai hrangah hriamhma a ngah mi tuar phah in a nunnak a rak cem a si.

          Curuangah kan nih khal Bawipai hrangah harsatnak phunkim kan ton caan ah tha nau lo in a hnenah thazaang la tlang uh si.

 

Add new comment

2 + 0 =