Mithianghlim Paul ih nunthleng awk nak Puai (January-25)

Mithianghlim Paul ih nunthleng awk nak Puai (January-25)

          Biaknak nei lo pawl ih dungthluntu Paul cu Turkey ram, Tarsus ah Jew Biaknak a thluntu nu le pa hnenin a rak suak. A mah cu Rome mi pakhat a rak si. Fimthiamnak lam thiam sinsin dingah Jerusalem khuapi ih on mi Gameliel ih tlawng ah feh in a fek mi Farasi pawl ih upadi kilhimnak pawl ah fimthiam nak a rak zirh. Jew pawl ih upadi pawl ah thakhoh nak thawn Mithianghlim Stephen cu lungto thawn an den ih an thah nak ah bawm nak, Christian pawl hrem in Pathian zum lo tu kaing pakhat si dingih tuah nak pawl ah a rak tel.

            Cu vek tuanvo pawl tuan dingah Puithiam upa pawl ih tuanvo pek nak thawn Damasus khuapi ih um mi Christian pawl an kai ih Jerusalem khuapi hruai dingah an rak tlan. Damasus khuapi ih a thlen caan, sun ah Vancung ihsin tleunak pakhat in rin lo pi in a run tlet ih leilung parah a rak tlak. Cui hnu ah aw pakhat a rak thei. Cui aw cun, “Saul, Saul! Ziang ruangah i hrem,” tiah a sut ih Saul in “Bawipa, nang cu zo na si” tiah a sut. Nunnak Bawi in “Kei cu hrem na hrem rero mi Jesuh Ka si” tiah a rak let. Tu rori ah tho aw la khuapi ah va feh aw. Na tuah ding mi cu ka lo sim ding,” tiin (Tirhthlah 9:4-6) sungah a rak sim. Saul thawn khual a tlawng tu pawl cu tong thei nawn lo in an rak ding. An nih cun cui aw cu an thei ko nain zo hman in an rak hmu lo. Saul a hung din caan ah a mit a pahnih in zianghman a hmu thei nawn lo ih a rualpi pawl in khua sungah an rak hruai.

            Nithum a rei tikah Ananias ti mi cu inn sungah a thleng ih a par ah a kut suang in “Ka nau Saul, Bawi Jesuh in tleu nak na hmuh thei sal nak dingah le Thiang Thlarau thawn khat dingah I thlah,” tiah a rak sim. Cui hnu ah Saul cu Baptism a rak lak ih Bawi Jesuh dung a thlun tu Paul cu thuthangtha sim in leitlun hmun zakip ah a feh. Jesuh Khrih hnenah minung siar cawk lo a rak hruai tu a si. Harsatnak phunkim lak ah Bawipa hna a rak tuan tu a si. Paul cu a kum a hungtam deuh ih thawng thlak nak phunkim khal a rak tuar. Paul hi a nun lai ah Khrih hrangih thih ding le harsatnak tuar cu a rak lungawi zet mi a si. Christian pawl hrang khal ah mangbangza ca tampi a rak ngan ti a si. Cu pawl cu Bible sungih kan hmuh mi vek an si. A ca ngan mi pawl cu epistles tiah kawh an si. Mithianghlim Paul ih lungthlengnak le thuanthu pawl cu Tirhthlah 9:22-26 ah fiangzet in kan hmu thei a si. Himi Mithianghlim Paul ih lungthleng nak cu Pawlpi ih nunnak hrang khalah a thupi tuk mi a si. Jesuh Khrish in Damascus lam zin parih Paul a rak kawh vekin Jesuh Khrish in in ko  a si. Amai hnen pan ih naih dingah le kan si nak vekin a hnen ih naih dingah in sawm a si. A hak mi kan thinlung, kan thleng thei nak dingah in bawm hram aw tin thla za cam tlang uh si. Mithianghlim Paul kan mah hrangah thla in cam sak aw. Amen.