Mithianghlim Paul Miki le a rualpi pawl (February-6)

Mithianghlim Paul Miki le a rualpi pawl (February-6)

          Japan ram Nagasak ih a hmaisabik martyr a si mi Mithianghlim Paul Miki cu 1564 ah a rak suak. A nauhak lai ihsin Jesuit kaing ah a rak lut ih Bible Cathianghlim cu hlawhtling zet in a rak sim thei.

          Japan ram ah kum sawmnga tuan in Pawlpi a rak din thok ruangah khohhran mipi taan hnih an um thlang a si.

          Kum 1588 ah ram uktu Siangpahrang Ganpagondono in kei mah lawng Pathian ka si tiah a than ih Christian Pathian riantuantu pawl cu ram ah thla ruk sungih tlung thluh dingah thupek a rak suah.

          Pathian riantuantu tampi cu thupek thlun in an tlung ko nain Brother Paul Miki le a rualpi 25 pawl cu ralkap pawl in an khuapi tampi lan in an rak hruai ih lamzin lak ah an vorhlam hna tan nak, zen nak pawl khal an rak tuar.

          An zaten Thinglamtah par ah thlai in an teen ih an hngawng pawl khal thir in an rak teen. An ralthat nak a hmu tu pawl cu an mang a bang ngaingai.

Mithianghlim Paul Miki le a rualpi pawl cu Pathian ih hmin sunlawi nak cu Saam hla pawl sak phah in an thangthat hnu ah “Bawipai kut sungah ka nunnak ka hlan a si” tiah tu le tu an sak.

Brother Paul Miki cu upat tlak zet mi Thinglamtah par in minung pawl hnenah “Kei cu Japan ram ah ka suak ih Jesuit kaing ah kawh nak ka rak ngah. Khrih thuthangtha hrangah thah ka tuar thlang ding. Ram uk tu Siangpahrang le ka nunnak a hua tu pawl ka ngaithiam a si. Cu pawl zaten Baptism la in Christian pawl ih cang dingah zaangfah ka lo dil” tiah a rak sim.

Cui hnu ah mi thattu pali in an naam cu an zuuk ih an zaten mitthep kar sungah an rak thah. “Jesuh, Maria” thlacamnak catbang lo ih an cam caan ah an mithmai cu remdai ten a rak um. Cui Japan ram ih martyr pawl cu 1862 ah Mithianghlim ih nemhnget mi pawl Hi mi thianghlim Paul Miki le a rualpi pawl cu 1862, June 8 ni ah Pope Pius IX in Mithianghlim ah a rak khaisang a si.