Mithianghlim Peter ih tohkham Puai (February-22)

Mithianghlim Peter ih tohkham Puai (February-22)

         Mithianghlim Peter ih tohkham Puai cu Rome khuapi ah kumzabi pali ihsin thok in an rak tuah thok. Tohkham ih (hminsinnak) a khih hmuh mi cu a thupi zet mi Pope um nak hmun “A thianghlim mi tohkham” (Holy Chair) tiih kawh mi “Pope zung” (Holy See) tiin an ko. Mithianghlim Peter ih tohkham cu Pawlpi parah Pope ih thu zirh nak Aanaa a rak hmuh. Pope in Pawlpi ih rinsan mi pawl zirh caan ah “tohkham ihsin” (From the Chair) a zirh tiin a rak sim.

         February-22 cu Rome khuapi ah Mithianghlim Peter in Bishop si nak a rak thawh nak kum kim ni a si. Pawlpi ih hlanlai daan vek a si le Missa sumnak tuah tikah Mithianghlim Peter ih hman mi a hlan lungto tohkham cu Mithianghlim Peter Biakinnpi ah a lu ih ummi thlapi hrek ah an ret tiin theih a si. Khrih le Mithianghlim Peter le a mah ai-awh tu pawl a rak zirh tu aanaa a rak pek. Galilee tili ih tilikap ah Bawipa in “nang cu Petru na si. Hi lungto par ah ka Pawlpi ka din ding. Cui Pawlpi cu thih nak hman in a neh nawn lo ding. Vancung uk nak tawhfung ka lo pe dingih leilung tlun ih na on mi cu Vancung khal ah on a si ve ding,” tiah a rak ti. Cui thu cu Mt 16:18-19 sungah fiang zet ih kan hmu thei a si.

         Mithianghlim Peter vek in Pope 264 cu Mithianghlim Peter ih tohkham ah an rak to ih zumnak thuthuk pawl le thlun ding daan zirh nak ah ziang tik hman ah an rak sual dah lo.

        https://bit.ly/3BJ2pqf