Mithianghlim Philip Neri

Mithianghlim Philip Neri

(1515-1595)

       Thlacam nak khaan le office khaan pawl rak din tu mithianghlim Philip Neri cu kum 1515 ah Italy ram Florence khuapi ah a rak suak. A nauhak lai ihsin thok in tangdor te ih a thungai nak ruangah Pippo Buono ih “mitha Philip te” tiah an rak ko. A kum 18 ih mangbangza thilcang pakhat a ton hnuah tha ten ruatcat ta lo in Pathian khawkhan nak le lamhruai nak zum in Rome ah a feh. A mah cu mifarah pawl hrangah a nun a rak hmang ih a innteet te ih nauhak pawl ca zirh phah in Theology tla a rak zir phah. A mah cu mifim pakhat a si teng teng ding tiih nemhnget mi a si. Asinan, rinlo paral ah, a ca uk pawl a zuar ih nuncan ziaza lam ih a tlasia tu Rome khaupi ih Pathian hna tuan dingah a rak thok. A mah cu hnihsuak sai phah in dawr lam ah a feh ih Pathian ih duhdawt nak thu  a rak phuang. A rak sim theu mi cu, “ka unau pawl thiltha tuah ding cu ziangtik ah kan thok ding,” ti mi hi a si.

               Kum 1548 ah upat tlak zet mi “Bawi thum kom Pathian pakhat ih unau pawl” ti mi pawlkom a rak din. A tumtah mi cu Pathian a biak tu pawl le a dam lo mi pawl hrangih tuan dingah a si. A duh zet mi upat nak pawl sungin Pathian biak nak, tlawng pasarih ih tlawn nak le nazi 40 sung Bawi Jesuh ih Thi le Sa upat nak pek ding pawl an si. Kum 1544 ih Thiang Thlarau puai an sawm zaan ah mithianghlim Sebastian ih a thlaan ih thla a cam lai ah meisa tleu pakhat cu a kaa in a taksa sungah a lut ih a thinlung a tum ter. Hi vek in thlarau thianghlim thawn a khat ih “a tawk zo, aw Bawipa tuar thei nak thazaang ka nei nawn lo,” tiah a rak au.

               A kum 36 ah, thlarau lam hruai tu Puithian ih thu ngai in Puithiam can nak a rak lak. Cui kum ah Vallicella ih um Santa Maria biakinn ah “thuralkhawm nak” ti mi pawlkom a rak din. Sualsir tu pawl ih thinlung neh thei nak thluasuah a nei ih mitampi ih nun a thleng ter thei a si. Zinglam hmuahhmuah sualthlahnak a ngai hnu ah thlarau lam lam hruai nak in Pathian thu sim nak a rak tuah. A tamsawn ah cu mithianghlim pawl ih thuanthu a sim. Cu theh in Biakinn pawl ih feh nak a si lo le zaanlam ih Pathian biak nak pawl ah a feh.

             Nikhat ah cu mithianghlim Francis Xavier ih thuanthu a siar theh ah ram dang ih Pathian thu sim duh nak thinlung a rak nei. Asinan, a thlarau lam hruai tu Puithiam in feh dingah thazaang a rak pek lo.

              Cui tlunah netabik nak ah thlasuah a rak pe ih ziang hmuahhmuah ih net nak cu kan zaten ka thi ding tiah a sim theh in a nun nak a rak cem a si.

              Hi mithianghlim hi mifarah nauta pawl hrangah a fim a thiam nak a rak hmang ih hlei ah mi naa le midam lo pawl tha zet in a rak zoh ih a rak tluam hlawm tu mithianghlim a si vek in kan nih khal kan mah le kan dinhmun cio ah midang hrang pumpe in a bawm tu kan si cio thei nak dingah thla in cam sak aw tiah zaangfah bom nak dil tlang uh si.

https://bit.ly/2XxO0td