Mithianghlim Robert Bellarmine ih Thuanthu tawi (September 17)

 

Mithianghlim Robert Bellarmine (1542-1620) September-17

             Mithianghlim Robert Bellarmine cu kum (1542) ah Italy ram Montepulciano ah a rak suak. A kum (18) a kim ah a pai lungkim nak tel lo in Rome ih um Jesuit tlawng ah a rak lut. Siangbawi a can hnu ah Belgium ram ih Luvin university ah an rak thlah. Cui university ah Protestant Professor thawn thu rel khawm nak tuah dingah a si. Cuihnu Kum sarih a rei hnu ah a thianhlim nak le a thil thiam nak ruangah Rome khua ih um university pakhat ah Theology zirh dingah tuanvo an pek. Catholic zum nak huhim ih a maih ca uk pawl sungih el awk nak ti mi cu a dang ca uk pawl hnak in a tha sawn ruangah an suah sal theu.  

Cui ca uk cu a thuk zet mi Bible thuhla le Pawlpi ih Pupa thuhla a ngan ih Protestant tampi khal in a ca uk cu a mai ngan mi ti an zum lo. Cui ca uk cu an khawng bik mi ca uk a si. London khua ih um ca uk zuar tu pakhat in a dang ca ngan tu saya pawl ih ca uk hnak in Bishop ih ngan mi ca uk in, paisa ka ngah tam sawn tiah a rak ti.

Robert cu hminthang zet mi Pathian thu zir nak ca uk pawl khal a rak ngan ih cui ca uk pawl cu Bawipa Jesuh ih nun zohthim nak ca uk le Cathianghlim siar lo a dang ca uk ah tong leh tam bik mi ca uk a si.

 (1598) ah Bellarmine cu Cadinel ih an hril hnu ah Tran council ih an tar lang mi thu rel cat nak pawl a rak tuah. A mah cu Vertican ah si nak tum zet ih um mi a si nan sang le khasuan raang lawng a rak ei ih a khan ih a hmang mi puanzar pawl cu mifarah pawl bawm nak ah a pek theh.

Kum li a rei hnu ah Camuaa khuapi ah Bishop rak ngah. A mah cu biaklam hnatuan nakah hmuh le ton nei tam mi a si lo nan Bishop a can ah a ngan theu mi ca uk pawl cu tan ta in Pathian hnatuan tu mino pakhat vek in zuam zet in thu tha a rak sim. Cui hnu ah a panga nak Popa Paul in Rome ah a ko ih cui khua ah library cauk retnak  hotu lawng si lo in a thupi zet mi thil pawl khal a rak sim fiang.

A mah cu kum (1620) ah a nun nak a cem. Mithianghlim Robert bangin kan ni khal Pathian hnatuan nakah thin that ho zet le huam nak tum zet thawn Pathian hna kan tuan cio thei nak dingah thla in cam sak aw tin zaangfah bom nak kan dil tlang pei.

Mithianghlim Robert hmin a la tu nan zaten Happy feastday tin nan kut nem kan lo kai.

Add new comment

8 + 2 =