Mithianghlim Thomas Aquinas (1225-1274) January-28

Mithianghlim Thomas Aquinas

(1225-1274) January-28

          Mithianghlim Thomas cu an mai san lai ih a rak suak mi Theology mifim pawl sungin pakhat a si ih 1225 ah Naple khuapi kiangih Aquishi upat tlak hrin hnam ah a rak suak.

          Monte Cassino ih um Benedict Yatih tlawng ah hmaisabik fimthiamnak a rak zir. Cui khuapi ih um Pathian thu sim tu pawlkom a rak duh zet ih a kum 19 ah Mithianghlim Dominic Yatih tlawng angki a rak ngah.

          A lian zet mi Mithianghlim Benedict Yatih kaing ih luh ter a duh tu, a nu le pa pawl cu an thinheng ih thawngtla pakhat vek in an va hruai kir sal. Kawh nak a ngah nak thim ter deuh deuh ding tumtahnak thawn a u le pawl in an khan sungah nunau pakhat an rak ret.

          Asinain, Thomas in funghreu keng tahrat in cui nunau nu cu a rak dawi. Kumhnih rei khum a tuar hnu ah a innsungsang pawl in a tinkaing ih feh an on sal.

          Kum 1245 ah Mithianghlim Thomas in Paris khuapi ih um Mithianghlim e hnenih fimthiamnak zir dingah an rak thlah. Dai ten a um nak le a tum zet mi a ruangrai ruangah a mah cu “Caw aa” tiin a hmin an theng sak.

          Mithianghlim Albert in a rualpi pawl cu a mawhthluk ih “caw aa” tiin nan ko. Asinain, a aw cu leitlun ih a hlat zet nak hmun tiang an thei ding,” tiah a rak sim dah.

          Buaih a ngah hnu ah, Mithianghlim Thomas cu hmun tinkiam ah hlawhtling nak thawn ruah nak, thlacamnak le tangdornak pawl cu tahthimnak ah re in thu a sim theu.

          “A mah in ca uk sungih zir hnak in Christu’i kehram in ka rak zir tam sawn” tiin khal a rak sim. 1266 ah Summa Theologiae a rak ngan thok. Cui a ngan mi ca pawl sungin Theology thawn pehpar mi ca uk tha zet tiah an ruat.

          Nikhat ah cun pulpit par ih um mi Christu in aw pakhat in “Thomas, ka thuhla tha zet in na rak ngan. Ziangvek miphun na duh?” tiah a rak sut ih Thomas in, “Bawipa nang mah rori lo cu zianghman ka duh lo,” tiah a rak let.