mithianghlim_dominic_salvio

Mithianghlim Dominic Savio (March 10)

           Dominic Savio cu 1842 ah Italy saklam ah a rak suak. Kumli a si lai ah a rak hlo. A nu in a va hawl lai ah Dominic cu thawmvang um lo nak hmun ih thla a cam lai a va hmu. A kumnga ah Dominic cu Pulpit (Altar) ah Puithiam pawl a rak bawm. A kumsarih ah hmaisabiknak Bawipai Thi le Sa a rak sang. Cui ni ah Dominic in a mai hrangah motto pakhat a rak hril. “Ka thi leh ding; Asinan sualnak tuah lo in!” tiah Pathian hnenah a thinlung ten thukamnak a rak tuah. Cule a thukam mi cang taktak dingah nitin ten thla a rak cam ringring. Kum 12 a kim ah Italy ram, Turin ih St. John Bosco ah tlawng a rak kai. Dominic in a innsungsang pawl a ngai tuk nan Don Bosco tlawngah nuam aw ten a rak um.

             A thinlung zate ih a can duh mi Puithiam cang dingih a tul mi zaten a rak zir. Dominic cu tlawngta fel zet a rak si; Asinan, hnihsuah sai peih zettu a si ve. A mah cu Don Bosco vek a si ih tlawngta pawl in rinsan tlak zet mi a si zia an thei. Veikhat ah Dominic in mi huatsuak pahnih an sualawk lai a rak then sak. Dominic in Thinglamtah fate pakhat keng in Bawi Jesuh ih in ngaithiam vek in pakhat le pakhat ngaithiam aw ding kan si tiah ralrinnak a rak pek. Cui hnu nidang ah, Dominic in mipa burkhat cu hmunkhat ah a to ter hai. A nih cu a mah ten a feh ih ziang mi hloptlo mi a um ti le fihnungza magazine pawl a rak hmu. A lak ih a thlek theh. Mipa dang pawl in Dominic a thinheng lai an hmu dah lo.

      ‘Oh, hi zuk pawl zoh ruangih ziang a cang saw?’ tiin mipa pawl cun an hun tong ngah pang. ‘A sual mi malte tal nan hmuh lo cun a poi tuk’ tiah Dominic in riahsia zet in a ti. Hi mi ih duhsan cu fihnungza thil pawl nan zoh theu tinak a si’ tiah a rak sim. Caan malte hrawng a rei deuh hnu ah, Dominic cu a dam lo. A dam deuh pang ah tiah inn ah an tlun ter. Asinan, a khua ah a dam deuh cuang lo. A besia sinsin ih netabik Sacramentu pawl a rak ngah. Dominic in Don Bosco tlawngah ka feh thei nawn lo ding ti a thei. Puithiam cang dingih a ruahsan mi cu a rak hlawhtling lo. A thih hlan te ah Dominic cu to thei a zuam. A pa hnenah ‘mangbangza thil pawl ka hmu’ tiah a rak sim. Cui hnu ah a lukham parah a it sal ih a mit a siing. Dominic cu1857, a suahcem a kim hlan Zarh malte a duh ah a nunnak a rak cem. Thubohcatnak a si lo le thil kan hril a tul caan tinten ‘hi hi Pathian lungawi ter tu a si maw?’ tiih mah le mah suhawknak thawn Mithianghlim Dominic Savio kan zohthim thei. Hi thusuhnak in hril ding tha pawl tuah dingah in bawm ding.

Add new comment

1 + 2 =