Naute Jesuh Biakinn sungih ap nak Puai (February-2)

Naute Jesuh Biakinn sungih ap nak Puai (February-2)

          Jesuh Khrih a suah hnu ni 40 nak ah Joseph le Mary in naute Jesuh cu Jerusalem Biakinn ah Pathian hnenah an rak ap. Cu vek ih tuah nak khal Pathian ih daan pawl thlun ih kilhimnak a si.

          “Minung siseh, ramsa siseh, Fapa hmaisabik pawl cu ka hrangah thianghlim ter uh, ka ta an si,” tiah suahhlannak 13:1 sungah kan hmu thei.

          Mary khal in thuro pahnih cu a thianhlimnak hrangah a rak ap. “Fapa siseh, Fanu siseh, thianhlimnak caan a nai tikah meiur thawinak caan a kim hrih lo mi tuufa te pakhat, sual ngaidam nak hrangah laileeng pakhat cu raithawinak ah ken a tul.

          Tuufa te ken thei lo a si le thuro pahnih siseh, laileeng pahnih siseh ken a theih,” tiin Puithiam hnatuannak 12:6-8 sungah fiang zet in kan hmu thei.

          Biakinn sungah Simeon tiih kawh mi, mi tlaitluang zet mi pakhat a rak um. A mah cu rundamtu Biak ngah hlan ah thih a ngah lo tiin Thiang Thlarau hnenin lang nak a rak ngah.

          Naute Jesuh cu a taang ah a cawi ih Pathian cu a thangthat in “Bawipa, tuisun ah hin na thukam mi cu na kim ter ih na salpa cu daitein a nunnak ni na liam ter thei thlang a si.

          Na minung Israel hnenah na sunlawinak thleng ter nak dingah siseh, miphun dang pawl khuatleunak pe dingah siseh, mi hmuahhmuah mit hmuh ih timtuah mi khuatleunak ti mi rundamtu Bawi cu kan mit rori in kan hmu,” tiah Lk 2:29-32 sungah a um.

          Cu vek ih tongkam pawl an theih tikah Joseph le Mary cu an mang a bang ngaingai. Simeon khal in thlawsuah a pek hai ih a nu Mari hnenah, “Hi naute cu Israel mi lak ah Pathian ih hril mi a si.

          “Cu le nang mah khal a hriammi ralnaam ih sun mi vek in riahsiat ninghannak in na thinlung a lo sun ding a si,” tiah a ti. cui thu khal cu Lk 2:34-35 sungah a rak sim.

          Naute’i nu le pa khal Pathian ih thukham vek in an tuah theh hnu ah Galilee ram, Nazareth khuapi ah an tlung sal. Naute khal a thang ih fim nak in a khat. Pathian ih thluasuah cu a parah a um.

          Simeon ih “ram tinkim ih tleunak” ti mi tongkam thawn Pawlpi in Naute Jesuh Biakinn sungih ap nak puai cu thluasuah pek zo mi phayawngtaing pawl thawn vel nak in a rak tuah.

          Cu vek ih tuah  nak cu Bawi Jesuh in that lo nak le thih nak ih khua thim nak cu a neh ih leitlun ah khuatleunak a ken nak tahthimnak a rak keng.

          Hi mi ni hi phayawngtaing thluasuah pek ni a si. Kan nih khal kan nunnak Pathian hnenah ap tlang uh si.