Rosary Siangpahrang Bawinu

Rosary Siangpahrang Bawinu. October-7 (1571)

          Rosary Siangpahrang Bawinu ih puai ni cu kum 1571 ah Mithianghlim Pius a panga nak ih Lepanto khuapi ih tipithuanthum ih raldo nak hminsinnak si dingah an rak tuah.

          Turk miphun pawl a rak huap tu Christian pawl ih tipithuanthum ral nehnak cu Bawinu Mariaih bawmnak a si tiin ruah a theih. A bawm nak cu a thianghlim zet mi Rosary camnak ihsin ngah a theih.

          Upat tlak zet mi cu hlanlai ih an sim mi vek si le cui a mawi zet mi thlacamnak cu Mithianghlim Dominic hnenah Bawinu Maria in a rak a rak pek mi a si.

          Saam number pawl thawn a bangaw mi Ave Maria thlacamnak 150 cu cui caan ah ca siar tu pawl in an rak thei thiam thei lo. Ave Maria thlacamnak ih hmaisa lam ah Mithianghlim Luka ih Cathianghlim sungin a lakih a pahnih nak cu hlanlai teette, pawlpi thuanthu (tradition) pawl thawn kom in a lak mi a si.

          Thuthuk 15 a si mi lungawinak, riahsiatnak le mangbangza pawl hi Pathian thu ruat lo-ih Rosary cam a si le nunnak nei lo mi minung thawn a bang aw tiah a rak sim.

          Italy ram ih um Loreto khuapi ih biakinn ihsin lak mi Litany pawl cu kum 1591 ah Rosary an cam tikah an rak cam tlang theu. Rosary an cam theh tinten kan cam theu mi “Aw ka Bawipa Jesuh! Kan sual nak in ngaithiam aw la hellrampi thawn in pelh ter aw. Minung hmuahhmuah na Vancungram thleng ter aw la na zaangfahnak a cuangce a tul mi pawl run bawm aw,” ti mi cu 1917 ah Fatima khuapi ih langnak a rak hmu tu nauhak pathum hnenah Bawinu Maria in a rak zirh.

          Thlacamnak pakhat lawng tu le tu camnak cu nin a um tiih a ruat tu pawl ralrinnak a rak pek mi cu fala le tlangval duh aw in “ka lo duh, ka lo uar” ti mi tongkam voi ziat an sim awk khal le an nin dah lo vek kha a si. A thianghlim mi Rosary cu duhdawtnak ih a sunlam pakhat a si.

https://www.youtube.com/watch?v=apuQDqKPCBA