Servites kaing dintu Pasarih pawl (1233)  February-17

Servites kaing dintu Pasarih pawl

(1233)  February-17

 

           Bawinu Maria ih sal pawl kaing cu Morte Senavio tlang par ah Florence ih a thianghlim pasarih in 1233 ah an rak din. Cu pawl cu Buofiglio Monaldi, Alessio Falconieri, Benedetto dell’ Antella, Bartolomeo Amidei, Ricovero Ugguccioni, Gherardino Sostene le Giovanni Bonajuncta pawl an si. Cui pasarih sungin innsang nei lo mi pathum, innsang nei pahnih le parol pahnih an tel. A thangso rero mi khuapi cu acozah party bang awk lo nak pawl le Biaknak lam ih dai ten um nak pawl a rak hnawihnih. Bawinu duhdawtnak ih a bang aw mi cui pasarih cu an khuapi ah thlacamnak le a tha mi hnatuannak pawl thawn din thei sal dingah an rak bot cat. Kum 1233 ah Bawinu Vancungram ih a kai nak Puai ni ah cui pasarih in Bawinu hnenin thlacamnak le dai zirziar nak ih nuam ten um dingah tha a pek nak langnak an rak hmu.

           Cu ve ten an mai hlawnthil pawl cu mifarah pawl pek nak, mai innsang ih an tulsam mi pawl hrangih an khawl sak hnu ah Pathian hnenah an mah le an mah an rak ap aw. An mah cu Monte Senario tlang par ah zum a theih lo mi thlun nak pawl an rak thlun. 1240 ah Bishop Padingo cu a hnenah a va leng ih an hnenah “nan thlun mi pawl cu a sang sang ih a keuh mi sersiam mi pawl thawn a bang aw tuk. Ralring uh!

           “Thlarau ral cu tu le tu a mah le mah khua tleu nak ih Vancungmi vek in a ra” tiah a rak cah. Bishop in Pathian ih thangphok nak ngah dingih thlacam dingah a rak cah. Cui hnu rei lo te ah Bawinu hnenin a voihnih nak langnak an rak ngah. Bawinu cun a dum mi kawrfual cu keng phah in Vancungmi in “Bawinu ih riantuan tu pawl” ti mi ca tluan a tel mi ca zual a ken kha an rak hmu. Bawinu in cui mi pasarih cu a mai riantuantu pawl ih a rak hril thu, a dum mi kawrfual a hruk hnu ah Mithianghlim Augustine ih upadi daan pawl thlun in kilhim a tul thu a rak cah.

           Bishop ih zaangfah dil nak ruangah an mah sungin paruk cu Puithiam cannak an lak ko nain, Brother Alessio cun tangdor nak thawn Puithiam cannak lak dingah a rak cohlang lo. Pope  Benedict 11 nak in 1304 ah “Bawinu ih riantuantu pawl” a tinkaing a nemhnget lai ah Brother Alessio a mah lawng dam in a rak tang.

 

Add new comment

1 + 0 =