Siena khuapi ih Mithianghlim Catherine (April-29)

Siena khuapi ih Mithianghlim Catherine (April-29)
Nunau Mithianghlim mal te lak ih Pawlpi ih Doctor buaih rak pek mi Mithianghlim Catherine cu kum 1347 ah Italy ram, Siena khuapi ih milian sungkua ih suak mi a si.
A kumruk ah langnak a hmuh mi ah Bawi Jesuh a hmu ih a nunnak cu Pathian hnenah a rak ap. Kum hleihnih a ti ah ziangtik hman ih pasal a neih lo ding thu a nu le pa ih theih nak dingah a mawi zet mi a sam cu a rak tan.
Kum 1365 ah Catherine cu Mithianghlim Dominic ih a pathum nak pawl thawn a rak nung. A mah cu tu le tu khuavang sualsawmnak a rak tuar..
Nikhat ah “Aw Bawipa, ka thlarau in hnaihnok nak pawl a tong ih harsat a tuar caan ah khui tawk ah na um,” tiah a rak au. Bawipa in, “Ka Fanu, Kei cu na thinlung sungah ka um ih tha ka lo pe theu” tiah a rak ti.
Kum 1366 ah Siena khuapi nuamnak an tuah caan ih a khaan sungih thla a cam lai ah Bawipa in Bawinu Maria le Vancungmi pawl cu a hnenah an va lang. Bawinu Maria in Catherine ih kut cu a laak ih Bawi Jesuh hnenah a pek. Bawi Jesuh khal in Catherine ih kut ah zunghruk a hruk sak ih a mah cu rak pom. Hi thlarau lam ih kut sih puai cu a theih mi Vancungmi lak ih a hnatuan nak ih hminsinnak a rak si.
A mah cu midamlo pawl le tlawngta pawl a rak kilkhawi. Asinan, Catherine cu mitha vekin a um aw ter tiah mawh an puh. Kum 1375 ah Pisa khuapi ih um Christina biakinn sungih thla a cam lai ah Bawi Jesuh hnenin hriamhma pawl a rak ngah. A thianhlim nak ruangah a hlan ih a rak huatu pawl thawi an ruah nak bangawk lo nak pawl hrangah thuthen nak tuar dingah kawh a rak tuar.
Kum 1376 ah a mah cu Rome khuapi in kum 75 tiang rori a rak suak tu a voihlei khat nak Pope Gregory, Rome ih kirsal dingih forhfial nak dingah France ram Avignom khuapi ah a rak feh. Catherine in a nunnak cu “Dialogue” ti mi cauk ih a ngan nak ah a caan a rak hmang. Cui cauk cu thiangthlarau Pathian ih Ruah nak vek ih a ngah mi asi.
Cui hlei ah theih cak zet mi ca 400 tluk a rak ngan. Cui ca pawl cu mawi nak thu le thlarau lam ih hminthang zet mi ca pawl an si. A mah cu upat nak, thinlungthiang ih um nak le thiam hleicee nak pawl ih danglam zet ih hminthang mi a kom ih a rak hmuh. Pope pa kha leilung pumpuluk thawn pehpar mi hotu upa pakhat ah a tuanvo pawl hngilh lo dingih a simcaan ah mithianghlim Catherine in Pope cu, “Ka duhdawt zet mi Pa Pa”, tiah a rak ko. Catherine in a mah le a mah Pawlpi hrangah a ap aw asi. Mithianghlim Catherine cu a kum 33 ah Bawi Jesuh taangah nuam zet in a rak cawl asi. Mithianghlim Catherine of Siena cu kum 1461 ah Pope Paul pahnih nak in mithianhlim tin a than ih 1970 ah a panga nak Pope Paul in Dr. buaih a rak pek asi.
St. Catherine ih a nunnak kan zoh tikah Pathian a duhdawt nak cu ziangdang hnak in a man ih a hleicee. Curuangah a nunsung khal ah lang nak a rak hmu tu, Jesuh Khrih a mah rori in a kutzung ah zunghruk a hruk sak nak a kutzung khal cu a tleu in a tleu ih a thinlung ah veikhat te hman Jesuh Khrih a rak hngilh dah lo. Minaa pawl khal dam ter thei nak a rak ngah. Curuangah kan nih khal St. Catherine bangin Bawipa kan duh nak cu ziang dang hnak khal ih kan thupit thei nak dingah a hnenah thla in cam sak aw tiah zaangfah bom nak dil tlang uhsi.