Singapore Catholic Sister pakhat leitlun Taekwondo Poomsae championship zuamawknak ah gold medal (sui tacik) ngah ( May 25, 2022)

Singapore Catholic Sister pakhat leitlun Taekwondo Poomsae championship zuamawknak ah gold medal (sui tacik) ngah

(May 25, 2022)

          April 21 ihsin 29 tiang thlang Korea ram Goyang khuapi ih tuah mi leitlun Taekwondo Poomsae Championship zuamawk nak ah a veikhat nak tiin Singapore ram ihsin black belt (taikhap dum) dinhmun asimi Sister Linda in gold medal (sui tacik) a ngah. Kum 67 asimi Franciscan (FMDM) Sister Linda cu a dang a zuam pi 6 a neh ih kum 65 tlun nunau pakhat ciar zuamawknak ih a neh nak a si.

          Poomsae timi cu thinlung ruahnak ih zuampi mi do ih khawmnak pawl thawn doawk nak a kop kop ih zuam mi pungsan a si. Singapore ram Taekwondo fedaration President David Koh khalin amai a sunloih zet thu a sim.

          Lehpannak cu mi tinkim hrang a si thu cu Singapore ram mino pawl in thei dingah amah cu a tleu zet mi zohthim tlak arsi asi thu Kho in a sim. Taekwondo lehnak cu Bawi Jesuh sangtu a si ih  amai nunram tluan ih a thupit mi thil pakhat asiih, kum cu a hrangah a thupi mi asilo theu Sister Linda in a hlawm. Leitlun ih a lu lam hmun pakhat ngah thei dingah amah cu zarhkhat ah vei 3 thla 9 sung nasa zet ih a zir thu "a nunram Taekwondo lamtluan ah a sangbik hmun a thlen thei ruangah leitlun lu ih um vekin a ruat" tiin Sister in a lungawinak a hlawm. Sister cu Pathian in a ko tiin a ruat ruangah Pathian riantuan mi nunram cohlang dingah a liam zo mi kum 43 lai ihsin Franciscan Sister kaing (FMDM) ih a rak luh thu, sung ding a tih loih a nu ih a kham nak lak ihsin Thompson lamzin ih Mt.Alvernia Hospital a din tu FMDM Sister kaing ah a lut tiin a sim.

          Ram hnatuan tu a pa le cazin check tu a nu hnen in a ra suak tu amah cu ralkap fanu asilole police thunei pakhat cang a duh nak sunmang nei cing in kumhra hrawng asi laiah party pawl ih fehnak le lek nak a phunphun zingzoi nak a rak tuah nan a fiang lo mi ruahnak a neih thu Sister kaing a lut hnu lawng ah a  thin a dai tiin a ruat thu Sister in a sim.

          Sister ih a kum 43 sung khalah lek tu pakhat ih a neih tul mi taksa um daan nei dingah le taksa fate in pi 4 le inch 11 le pound 110 hnakih mal dingah dingah a zuam thu, "remdaihnak cu neihnak hnakin a man a tam" timi Taekwondo leknak ih thulu cu Sister nun ram thawn khal a kaih ruangah Taekwondo a lek sal nak a si thu,

          Pathian rian dingah a hlan mi a Sister nunram vekin Taekwondo leknak parah a duhnak khal a hnget ringring ding thu, tuak par (samrang) zomi pawl zuamawknak zoh phah in Singapore rammi a sinak par khalah a sunloih awk thu Sister in a sim. Sister cu 2011 lai ihsin ram tinkim zuamawknak 25 ah a zuam ve ih gold medal 30 luan a ngah zo.

          2018 leitlun Taekwondo Poomsae zuamawk nak ah dar tacik a ngah thei. Siizung hotu dinhmun khalin Sister cu England ram ah kum 17, Zimbobue ramah kum 3 hna a tuan zo. STF thuzir nak a kai hnu nauhak pawl Taekwondo zirhin a tuah cun Singapore ram FMDM Sister pawl ih Pathian riantuannak hnatuan pawl ah a tel.

          Kum 32 asimi fimzirh tu Ms.Pamela Lim in "Sister Linda cu thazang thawn a famkim mi lam hmuh tu tha pakhat asi lawng siloin mino pawl hrang khalah zohthim tlak pakhat asi thu" a sim. Himi thuthang cu RVA thuthang ihsin kan don mi a si.  

https://bit.ly/3N7vFMt