st. bernard of clairvaux

Mithianghlim Bernard

(1090-1153) August-20

            Mithianghlim Bernard cu Clairvaux ih ho tu Puithiam a si. Kum 1090 ah France ram, Fontaine-Les khuapi ah hnam sang mi sungkua in a rak suak.

A kum 22 ah Biakinn pakhat ih thla a cam lai ah Citeaux khuapi in Cistercian Yatih kaing ih lut dingah Pathian ih kawh nak aw thawm cu a thinlung in a rak thei.

          Teette a khan mi in mi a hiip tuk ruangah a rualpi pawl, a upa pawl le a sungkhat 30 in an thlun ih Puithiam ah an rak lut. Kum thum a rei hnu ah Bernard cu Yatih 12 thawn Wormwood horkuam ih um hramlak hmunkhat ah Yatih tlawng thar din dingah an rak thlah.

          A thianghlim zet mi a hminthannak cun a Pa le Yatih thar 130 a rak hiip thei. Nikhat ah hnaihnoknak dai ter dingah ti khal vek ih a dai mi tidai sungah a rak dop.

          A dang pakhat cu Hotel pakhat ih a um lai ah nunau sia pakhat cu lawngfangkheh in a kiang ah a ra ih theih ter awk nak a neih tikah a tlan ih cu ti cun a thianhlim nak cu a rak run thei.

          A tam zet mi thil a ti thei mi pawl cu a zaangfah dil nak ruangah tiin an ruat. Voikhat ah Putar pakhat a thih hlan ih sual thlah thei dingah tong thei nak huham a rak tuah sak.

 A dang pakhat cu Foigny Biakinn ih tho thee tampi cu a kawk veten an zaten an thi thluh. A hmin a thang tuk ruangah Siangpahrang fapa le fanu pawl le Pope pawl in a hnen in ruah nak tha pawl an rak dil theu.

Pawlpi ih ral pawl khal a thianhlim nunram le hminthang zet mi ca ngan pawl khal an rak upat zet. Kum 1144 ah Pope a pali nak Eugene in a voihnih nak crusade raldonak hrangih thu rel tlang dingah a hnenah thu neih thei nak aanaa an rak ap.

          A tongkam ih forhfial nak pawl ruangah Christian tampi cu a thianghlim mi hmun le ram ah an tlan. Cu tiin crusade raldonak cu ral sun nak thawn a rak reh.

Hi mi zoh nak in Mithianghlim pawl voikhat voihnih le sualnak an tuah mi a um thei thu kan thei thei. A mah cu kum 1153 ah a rak thi.

          Mithianghlim Bernard cu hlanlai Christian pawl lak ah hminthang zet mi Mithianghlim a si bangtuk in khawhhran hrang khal ah tampi ruah nak petu a si. Cui hlei ah Pathian hntuan nak ah sualforh nak phunkim le do nak phunkim pawl cu Pathian thazaang thawn a rak so thei vek in kan nihkhal nitin kan nunnak ah sualforhnak pawl kan do thei nak dingah thla in cam sak aw tiin zaangfah bawm nak dil tlang uh si.