St. Ignatius of Loyola (July-31)

St. Ignatius of Loyola (July-31)

              July 31 cu Jesuit a tinkaing (congregation)  dintu St. Ignatius of Loyola ih puaini a si. Mithianghlim Ignatius cu Spanish Basque ram, Loyola khua ah 1491, October 23 ni ah a rak suak. A suahkeh nak Loyola khua a si ruangah St. Ignatius of Loyola tin kawh a si. Unau hleithum lak ah nauta bik a si. A nu cu a mah a hrin hnu a rei hlan ah a thih san. Ignatius cu ralkap pawl ih cangvaih daan pawl kha a uar zet tu a si. Kum 17 a si in ralkap ah a rak lut. Ignatius cu hnipuan mawt zetzet hruk ding a uar zet, lam tla a thiam zet tu a si.

            Kum 1521, May thla ni 20 ah Ignatius cu raldo nak ah a vorh lam ke meithal kah nak a rak tong. Cu ruangah Ignatius cu Loyola khua a pa ih inn ah a tlung sal. Sibawi pawl in sivai phunphun hmangin an tuamhlawm ih a ke cu a hung tha.  Asinan, a vorhlam ke cu keh lam ke hnak in a tawideuh ruangah a nun sung ah ke ol in a um lan a si. Ignatius cu sizung ah a ke operation an tuah ih sizung ah rei pi a um nak ihsin a nuncan a thleng tu a si. A sizung to nak ah mina pawl hrang siar ding Pathian thu ca uk, thlarau lam ca uk le Bible tla an rak ret sak. De Vita Christi (Bawi Jesuh ih thuanthu) timi ca uk a siar hnu in St. Francis Assisi le a dang yatih pawl vekin mah le mah Pathian hnen pumpe dingah lung duh nak a nei thok a si. Christian a si lo mi pawl hnenah thuthangtha phuang ding a duh zet.

         Ignatius cu dam cak ngaingai in a hung um hnu ah Bawi Jesuh ih a rak tlanlen nak Holy Land ah a va tlawng ih a sual nak pawl hrangah sualsir nak a tuah a si. Zaan a mang ah Bawinu Maria leh naute Jesuh a hmu ih Ignatius cu lunghmui zet in a um. Kum 1522, March thla ah Benedictine Monastery ah a tlawng ih a ralkap thuam cu phoih in a hnipuan thatha tla cu mifarah pawl a rak pek theh a si. Pathian cu a thinlung tak in a duh vivo ih Pathian in a hennah ziang a duh sak ti khal a thei. Ignatius in mi ih nuncan thleng ter dingah fimthiam nak a tul ti a theih tikah Barcelona ah kir sal in tlawng a kai sal.  A kum 44 a si ah Master Degree a rak ngah.

         Kum 1534, August 15 ah a rualpi hrekkhat thawn thianhlim nak, farah nak, thu ngai nak timi thukam nak pawl tuah in an mah le an mah Pathian hrangah pumpe aw in an um. Neh hnu ah cuih an thukam pathum hlei ah Pope Bawipa ih thungai dingin tla thukam nak an tuah. Kum 1540 ah Pope Paul III nak in Jesuit Loyola cu Pope Paul V in 1609 ah Pope Gregory XV in Mithianghlim a si tiah nemhnget nak a nei. St. Ignatius of Loyola bangin Pathian duh nak thluntu le a tuah tu kan si ve thei nak dingah a hnenah thla in cam sak aw tiin zaangfah bawm nak dil tlang uh si. St. Ignatius hmin nei tu pawl zate leh Jesuit a tin kaing zaten Happy Feastday tiin Falam RVA in nan kut kan lo kai a si.

 

Add new comment

5 + 3 =