St. John Letaran Biakinnpi ap nak Puai (November 9)

St. John Lateran Biakinnpi ap nak Puai

November 9

          St. John Lateran, St. Peter, St. Paul le St. Mary Major ti mi Rome khuapi ih Biakinn pi pali sungin St. John Lateran Biakinnpi cu kum rei bik le hmaisabik ih rak nemhnget mi Biakinn pi a si.

          Hi Biakinnpi cu Constantine Siangpahrang ih rak hlu mi leiram parah kum 313 ah an rak sak mi a si ih cu lai ah Lateran um nak inn tiah an rak ko.

          A thok nak ah “Rundamtu ih Biakinn” tiah theih a si ko nain neta lam ah Mithianghlim John pahnih a si mi Baptism petu John le Cathianghlim ngan tu John pawl ih hmin in an rak ap.

          Biakinnpi ih raithawinak tuah nak ah Dungthluntu Mithianghlim Petru ih a rak hman mi thing ih tuah mi raithawinak ro thil khal a tel. Cui Biakinn sungih um Bawipai Thi le Sa ret nak khuathai ah Mithianghlim Petru le Mithianghlim Paul pawl ih an lu pungsan in an tuah.

          Rome khuapi ih Cathedral le Pope ih a um nak hmun a si vek in Biakinnpi hmaiah “Rome khuapi le leilung pumpuluk ih um mi Biakinn pawl ih Nu le Lupi tiah hmin a nei.

          Hi puai tuah nak cu Pope upat nak, rinsan tlak si nak le Pope thawn pumkhat si nak ih hminsinnak a si. Antioch khuapi ih Mithianghlim Ignatius ih sim mi vek si le Pope cu duhdawtnak pawl ih hmun pakhat uk tu a si.