St. Joseph thuanthu tawi (Bawinu Maria ih innsangpa) (March 19)

St. Joseph thuanthu tawi (Bawinu Maria ih innsangpa) (March 19)

Thianghlim Maria ih innsaangpa, Bawi Jesuh kilkhawi tu Mithianghlim Joseph cu David ih tefasin a si. Mithianghlim Joseph cu Nazareth khua te ih a um mi Inn sak tu a si ih Maria thawn an ham aw mi khal a si. An mai pupa daan ih an tuah daan vek in mithianghlim Joseph cu Maria thawn thit-aw dingih hril nak ngah tu a si. Ziangah ti le a kianghrol in diadimpar a par ruangah a si. Maria cu Mithianghlim Joseph thawn an ham awk kum ah fa a vun. Mi tlai tluang mi Joseph cu mi tha a si ruangah Mari kha mi hmaiah ningzak in um ter a duh lo ih an ham awk nak cu a thup ten in phelh saal a tum. Cu mi thu a ruah rero lai ah a mang ah Bawipa ih vancungmi pakhat a hnenah a lang ih, “David tefasin Joseph, Mari hi na nupi ih thit dingah tih hlah. Ziangah tile fa a vun nak hi Thlarau Thianghlim thawng in a si” tiah a ti. Joseph cu a hung thang ih, Bawipa ih vancungmi ih fial vek in Mari cu a kilkhawi. Rundamtu Mesiah cu Bethlehem khua ih mi pum an sir lai ah a rak suak. Cu le vun zim tan ding ih niriat a kim ni ah mi thianghlim Joseph in a fapa cu “Jesuh” tiah hmin a pek. Mifim pathum khal naute biak ding ah an feh. Cuih mifim pawl an feh hnuah Bawipa ih vancungmi cu Joseph ih mang ah a lang ih, “ tho aw la naute le a nu thawn Izipt ram ah tlan uh. Kir sal ding ih ka lo sim hlan lo cu tawk ah an um pei,” tiah a ti. Hi catlang cu Mt 2: 13 ah kan hmu thei a si. A ti bangtuk in Joseph cu a tho ih naute le a nu thawn a zan zan in Izipt ram ah an tlan. Kum tawkfang a rei hnu Herod a thih hnu ah Bawipa ih vancungmi cu Joseph ih mang ah a lang ih Nazareth ih kir sal ding in a sim. Mithianghlim Joseph ih kaih hruai nak ruangah Jesuh cu fim thiamnak ah le (lettama) inn sak daan a rak thiam. Pawlpi in mithianghlim Joseph cu thih tha ih thih thei nak ding hrangah mi bawmtu tin a rak nemhnget. Ziangah tile a mah cu Bawinu Maria le Bawi Jesuh ih bawm nakin a hnget khoh mi zum nak le thinlung nuam te in a thih ruangah a si.Pawlpi thuanthu ah Mithianghlim Joseph cu Bawi Jesuh ih Pathian thu a sim hlan March ni 19 ni ah a thih thu kan thei thei a si. Pathian ih Bawinu Maria him nak ding hrangah mithianghlim Joseph in a nun pumpuluk in a rak ap ruangah a thianghlim mi a nun nak fala thianghlim (nunram) rak kilkhawi tu mithianghlim a si. Leitlun huap thawn a pehpar aw mi Pawlpi kilkhawitu mithianghlim a si tiah an nemhnget a si. A mah hmin a ko ih a rinsan tu pawl zaten a kilkhawi tu mithianghlim khal a si. Mithianghlim Joseph vek in Pathian rinsan in a nung tu kan si thei nak dingah zuam tlang uh si.