Thumkom Pathian puai ni 

Thumkom Pathian puai ni 

          Hi mi Puai ni hi Pentecost hnu a hmaisabik Zarhpi ni sunglawi Thumkom Pathian Pa, Fapa, Thiang Thlarau pawl ih puai ni sunglawi a si. Hi puai ni hi kumzabi pali lai ah mipi pawl lak ah Arian heresy ruahnak sual a um lai ah an rak hmang thok zo a si.

          Arius in Jesuh Khrih cu sersiam mi (milai menmen) Pathian a si nak le Pathian pakhat ah Bawi Pathum a um ti mi thu a rak el ih Alexandria khua ih Bishop Athanasius le Deacon pakhat in nasa zet in an rak el ve a si.

          Siangpahrang Constantine a pakhat nak ih hoha nak in kum 325 ah Nicaea Council an rak tuah ih cu mi ah Alexandria Bishop le Athanasius tla an rak tel ve. Catholic zumnak cu Pathian pakhat ah Bawi Pathum an um ih cu mi cu pumkhat an si. Athanasius in thumkom Pathian a si thu nasa tak in a rak el ih Council in Kawhhran thu rin ah an pom a si.

          Athanasius in Thumkom Pathian thu a sim mi Catholic zumnak cu Thumkom Pathian Pa, Fapa, Thiang Thlarau cu pathum si lo in Pathian ah pumkhat an si. An sunlawinak ah cun an bangrep, an ap nak cu kumkhua a si.

          Pa, Fapa, Thiang Thlarau cu kumkhua a nung mi, sersiam mi a si lo, kumkhua cem ni nei lo mi an si. Pa cu ziang hmuahhmuah tuah thei tu, Fapa cu ziang hmuahhmuah tuah thei tu, Thiang Thlarau khal cu ziang hmuahhmuah tuah thei tu an si ih thil tuah thei tu pathum si lo in pakhat an si.

          Pa khal Pathian, Fapa khal Pathian, Thiang Thlarau khal Pathian a si nain Pathian pathum si lo in pakhat lawng a si. Pa cu tuahcop mi a si lo, sersiam mi si lo in hrin mi a si.

          Fapa cu Pa hnen ihsin a si ih tuah mi a si lo, sersiam mi si lo in hrin mi a si. Thiang Thlarau cu Pa le Fapa hnen ihsin a si ih tuah mi a si lo, sersiam mi a si lo, hrin mi khal a si lo; Asinain, Pa le Fapa thawn pehzom mi a si.

          Thumkom Pathian ah hmaisa, neta ti a um lo, a tumsawn fate sawn ti a um lo, Bawi Pathum ah kumkhua in bangrep an si. Thumkom Pathian ah lungrualnak a um ih lungrual nak ah thumkom Pathian a um a si.

          Pope John XXII nak in Kawhhran pi ih puai tuah dingin a sim ih Pope Pius a pahra in kum 1911, July 24 ah Puaipi pakhat (solemnity) ih hmang dingah a than a si.

          Hi mi Bawi Pathum Pathian pakhat (Holy Trinity) puai ni sunglawi ah hin Kan Pathian in lungrualnak in pe hram seh tiin thlaza kan run lo cam sak a si.