Mithianghlim John Mary Vianney

St John Mary Vianney cu kum 1786 ah France ram Lyon khua kiangah a suak. A pa cu lo thlo mi a si. A pai tuu pawl a rak duh zet tu khal a si. Nau hak lai in thlacam zuam zet tu a si ih kum 18 a kimah a pai hnen ih Siangbawi cang dingin a rak dil nan a pain lo lam ah bawm tu ka nei lo pang ding tin a rak siang lo. Cui hnu kum hnih a reiah a pai lungkim pi nak a rak ngah ih Fr Balley an ti mi kung tangah ca a rak zir.

            A zirh tu Siangbawipa cu thin sau zet mi a si. John Mary Vianney hrangah Latin ca a har deuh ih a thlun thei lo. Curuangah John Mary Vianney cu thin nau zetin a rak um. Cuihnu ah France ram ih hmin thang zet mi St. John Francis Regis ih zuk um nak peng 60 a hlat nakah a feh. Cui St John Francis puai cu June ni 16 ah an hmang theu. John Mary Vianney cun in aw tin thla a rak cam. A duh daan vekin ca a rak thlun thei lo ruangah a thin nau zet in a rak um theu.

            John Mary Vianney cu neta bik seminary (Siangbawi tlawng)ah cami buai a rak phi. Cui a veihnih an phit nakah cun ca in phi lo in kaa thawn an phi. Hmaiton ih Saya thawn biak awk phah ih phit hi a si. An suh mi a har tukih John cu beidongin a um. Fr Balley ih John Mary cu Catholic Kawhhran pi zirh mi khal a thei thluh ko, amah le mi tha te a siih mithianghlim a si. Curuangah Ordination, Siangbawi can nak pek dingin a rak lung kim pi.

            Cutikah John Mary Vianney cu Siangbawi can nak a ngah ih Fr Balley hnen ah a bawm tu dingin 1817 Fr Balley a thih tiang cu tawk hmunah a rak tuan. Cuihnuah Fr John Mary Vianney cu Ars ti mi khua te hmun khatah siangbawi a rak tuan. Ars khua mi pawl cu a thok ah cun an zum nak a mal zet nan Fr John Mary Vianney ih thlacam nak, rawl ulh nak le sup nak phun kim ruangah zarh pi ni lawng si loin ni tin ten Mass raithawi nakah an khawm thei thlang.

            Curuangah Ars mi pawlin kan Siangbawi hi mithianghlim pa khat a si. A thu kan ngai a tul tiah an ti. Pathian in John cu a hmang vi vo ih cui khua sungih mi sual pawl khal an thlengaw theh. John Mary Vianney cu Pathian a hmang vi vo ih ni khatah sual thlah nak nazi 16 sung a toih hmun dang dangin a hnen ih sual thlah duh ah mi tam pi an ra theu. Sual thlah tu Pawl an sual nak an sim hlanah John Mary Vianney cun a rak thei hmai sa theu.

            Ars khuaah kum 42 a umih 1859 kum 73 a kimah a thi. 1925 ah Pope Pius XI in Mithianghlim a si thu a phuang. John Mary Vianney cu Bawipa thi le sa  hnenah upat nak nei zet tu a si. Hi mi Sacrament kan san nakin kan sual nak in ngaidam ih thlasuah nak in pek a si. Cui thluahsuah thawn kan nun a tul a si tiah St John Mary Vianney cun a rakpom ih a nun pi mi a si.

            St John Mary Vianney bangin Bawipa a rin san nakin leitlun ih a ca zir mi thiam thei thluh lo hman seh Bawipa rin san tu hrangah zianghman thin nau ding le beidong ih um nak a um lo zia thu hi tui sunah in zirh a si. Tui ni tiang St John Mary Vianney puai ni cu August 4 niah kan hmang a si. Himi ni hi Siangbawi pawlih puai ni tin pawlpi in an run ngamhnget ta. Curuangah August ni 4 niah hin kan Siangbawi pawl hrangah thla kan cam a tul a si. Thlacam sak cio uh si.