Tours khuapi ih Mithianghlim Martin (316-397) November-11

Tours khuapi ih Mithianghlim Martin

(316-397) November-11

          Ralkap pawl kilkhawitu le ralkap pawl ih rinsan mi Mithianghlim Martin cu 316 ah Hungary ram, Pannonia khuapi ah Pathian zum lo tu nu le pa hnenin a rak suak. Rome ih hnatuan mifim pakhat ih Fapa a si vek in ralkap ah a duh lo na cing in an rak luh ter. A kum 23, Ameins ih an um lai ah sangkaa kiang ih kutdawh pakhat cu a daih tuk ruangah thi zik te ih a um kha a hmu. Cu ve ten a angki cu pahnih ah thlek tahrat in pakhat cu cui mifarah, kutdawh cu a rak pek. Cui zaan a ih ah Martin in a mang ah Bawi Jesuh in cui angki hrek a rak hruk kha a hmu. Cui sin thok in Pathian hrang lawngih rian tuan thei dingah ralkap cu a rak tansan. Sihmansehla, Barbarian misual, dodaltu pawl ih an do zik zawng te ah Siangpahrang Julian khal in hi thilcang cu a tih hrut ih tuah mi tiah a ruat ih Martin in “Jeush Khrih hmin in kei cu hriamhrei tel lo in raldo nak ih tang dingah ka man cia, ral pawl hnenih pakhat lawng feh dingah ralring cia aw,” tiah a rak let.

           A thaizing ah mangbangza zet a si mi dodaltu pawl cu rual rem nak tuah dingah an ra. Cui hnu lawng ah Martin cu ralkap ih suak dingah le Baptism lak dingah a lungkim pi. A innsungsang pawl hnenah Pathian thuthangtha a sim hnu ah Martin cu France ram, Liguge ah Yatih a rak lut. Kum 371 ah Tours khuapi ih Bishop ah hril nak a rak ngah.  A mah cu tuukhaal tha a si thu khal a rak hmuh thei. Yatih tlawng pawl a rak sak thei vek in Puithiam pawl khal fimthiamnak a rak zorh ih khuate mipi pawl ih thlengawknak ah tha a rak suah. A mah in khuavaang bia tu pawl ih a thianghlim Biakinn an ti mi a rak siatsuah. A nunram netabik ni ah a kut pahnih cu Van lam ah a hun thlir ringring.

           Siir zawng ih ih nak thawn hmun a zia deuh ding, tuar a nuam deuh ding tiih ruah nak a petu pawl cu “Kan mah cu leilung zoh hnak in Vancungram zoh in on aw,” tiin a rak let. Cu hnu ah a kiang ih khuavaang a din kha a hmu ih “thi haal pa! na rawl ka si lo ding, kei cu na ei mi sa ka si dah lo ding,” tiah a sim hnu ah 397 ah a rak thi. Hi Mithianghlim cu ralkap pawl kilkhawitu tiin Pawlpi ih a hngemhnget bangin leitlun ih um mi ram mipi a kilkhawi tu ralkap pawl hrang khal ah thlacam sak ve uh si. Cun Martin hi a Pathin hna a tuan thok in khuavang tha lo pawl do nak tampi a rak neh tu a si vek in kan ral a si mi leitlun ral, thlarau ral le tisa ral pawl kan do neh thei nak dingah thla in cam sak aw tiin zaangfah bom nak dil tlang cio uh si.

https://www.youtube.com/watch?v=yDY9_yTDQbM