Mithianghlim Ambrose (340 - 397) December - 7

Mithianghlim Ambrose (340 - 397)

December - 7

            Milan khuapi kilkhawitu Mithianghlim Ambrose cu kum 340, Germany ram ih Trier khuapi ah a rak suak. A pa a thih hnu Romeah fimnak a rak zir ih neta ahcun Milan ah Pathian hna a rak tuan. Kum 373 tiang zumtu Khrishfa a si hrih lo nan, mipi pawl ih lungkim nak in Milan Bishop ah an rak hril. Cuveten tikholh nak le Bishop can nak a rak ngah.

            Cui sin thok in a neih mi a thil ri zaten mifarah pawl a pek theh ih a thinlung zaten midang pawl hrangah a rak ap. A nun sung hmuah hmuah ah tlaitluang zetin le zuam zetin a can a rak hmang. A tikcu caan tamsawn ah Bible siar in le Bible zirh nakah a thinlung a rak pek. Milan Cathedral Biakinn ih Mithianghlim Ambrose ih Pathian thu sim mi ruangah Mithianghlim Augustine a nun a rak thleng. Ambrose in Pawlpi harsat nak tumzet a ton laiah Pawlpi ih tangphawlawng tum pi pawl a rak zuar ih a ngah mi paisa in mifarah pawl a rak bawm. "Pawlpi in sui hman ding a neih asile ret men dingah silo in bawm nak a tul mi pawl hrang ih hman ding a si sawn" tiin Ambrose in Pawlpi hnenah ruah nak tha a rak pek.

            Thianhlimnak thawn Pathian hnatuan pawl a lawm hleiah, a lamhruai nak hnuai ah fala thianghlim tampi a ret. Cui a hnataun nak cu ramsung ih minung pawl malter dingah a tuah tin an puh mawh tikah "minung pawl maldeuh deuh dingih a tuah tu cu fala thianghlim pawl siloin raldo nak a si sawn" tiah a rak let. Mithianghlim Ambrose cu a kum 57 ah Pathian ih tang sungah a rak cawl. A ruak cu rampi ih vui sak nakin Milan Biak inn hnuai ah an rak phum a si.                   

https://www.youtube.com/watch?v=PpyKriD1_AY