Thailand Catholic Pawlpi ih martyr Nicholas Bunkerd Mithianghlim ih khaisannak kum 22 kim tuah (March 11, 2022)

Thailand Catholic Pawlpi ih martyr Nicholas Bunkerd Mithianghlim ih khaisannak kum 22 kim tuah

(March 11, 2022)

         Bangkok Archdiocese in Fr. Nicholas Bunkerd ih Mithianghlim ih khaisannak kum 22 kim ni cu March 05 ah a rak tuah. Fr. Nicholas Bunkerd cu martyr pakhat a si. Pulhnat in buainak a pek rero nan cui kumkim ni biakthawinak caanserh ah mipum 100 hrawng an rak tel. Hi biakthawinak cu Bangkok thawn kilometer 44 a hlat nak martyr ih Biakinn umnak Sampran ah an rak tuah.

         Martyr cu St. John Paul Ii in (March 5, 2000) ah St. Peter tualrawn ah Mithianghlim ah a rak nemhnget. Martyr cu Vietnam saklam ah Pathian rian a rak tuan. A mah cu 1926, Bangkok, Assumption Cathedral ah Puithiam cannak a rak ngah. A hleice ih a thinlung thakhohnak cu Catholic mipi pawl Pawlpi sungih kirsal dingah, a thupibik in harsatnak ruangah Pathian le thudik hngilh in mai pumcawmnak lawng thupit tu pawl, ram acozah ih fialnak ruangah siseh, mai zumnak a tansan tu pawl ko kir sal dingah a si.

         A tumtah mi vekin a rak tuah suak thei. Asinan, Christian a hua tu Thailand acozah ih thatlonak cun a dung in a rak thlun. Catholic Pawlpi cu ‘miphun duhdawtnak a nei lo mi Pawlpi’ tiah a nemhnget ih a rak hrem. Cui hmun ih um Catholic kohhran pi pawl in Thailand acozah an tih tuk thu France ram in Pathian rian tuantu Fr. Moris Meunier in a sim.

         Martyr hnenah hmaisabik rian a rak tuannak hmun ih dinhmun Fr. Moris Meunier in a sim mi cu Catholic pawl in an Rosary pawl cu acozah thuneitu pawl in an hmu ding an phan ruangah khur an lai ih leilung sungah an phum tiah a rak sim. Nakhon Ratchasima ih Catholic mipi pakhat in hrem an tuar lai ah ralkap pawl le khua u pa pawl cu Biakinn sungah hmuan kulhnak pawl, saangkaa pawl bal in an thleng ih Catholic kohhran mipi pawl hnenah an zumnak thlahphoih dingah a phunphun in hringhronak pawl an rak tuah. France le Indochina pawl an doawk lai ah martyr Nicholas cu France hrangah thlingthlatu tiah an puh. Cu tiin January 12, 1941 ah martyr Fr. Nicholas cu Biakinn khawnglawng tum in mipum a khawm. Cui ni cu Zarhpi ni a si ih Missa sumnak tuah dingah a si.

         Hi vekih a tuah ruangah kum reipi thawngthlak a rak tuar. Thawnginn ih a um laiah dai ten a um men lo. Ralkap lam tang pawl Pathian thu a rak zirh. Thawnginn sungah thawngtla mi (68) Baptism a rak pe thei. A ralthatnak cu ca ih ngan men in a cem thei lo. A mah in Rosary camnak thawn a thinlung a dai ter theu. A mah cu nasa zet in hremnak a rak tuar. Thawnginn sungih a um lai ah TB natnak a rak nei. Siizung ah an kuat ih thi dawk nung dawk in an taan hrim. Catholic a si ruangah siivai tuamhlawmnak pe lo dingah thupek an suah. A mah cu Januaru 12, 1994 ah a nunnak a rak cem.

         1992 ihsin thok in Bangkok Catholic kohhran mipi pawl in Mithianghlim ih khaisang dingah an rak zuam. Martyr ih nunram cu Thai Catholic Pawlpi hrangah tha tam ter tu hminsinnak pakhat a si. Thai Catholic pawl khal in an upat zet. A mah cu mi lainattu, thinsau tu, a Tuu pawl thawn nel aw ten biak awknak, mino, nauhak pawl  Pathian thuzirhnak, farah harsa pawl bawmnak a rak tuah. Biaknak lam ah zalen zet ih biaknak hrangah martyr in a nunnak a rak hlan.

         Missa raithawinak cu Fr. Somphop Roenwutichnapheat in a rak hoha. A thusim mi sungah martyr cu Thailand ram hrangah Pathian ih laksawng a si. A mah cu zumnak ih cawntlak a si. Pathian riantuannak ah khal thinlung thakhoh zettu a si. A innsang cu a famkim lo. A mah cu January, 1895 ah Thailand ram, a lai hrawng, Nakhon Pathom ah a rak suak. A nauhak lai in Catholic Puithiam si dingih rak zuamtu a si. A kum 13 ah hramthok Puithiam tlawngah a rak kai ih Malaysia ram, Penang khuapi ah Catholic Puithiam pakhat di dingah theih tul mi pawl a rak zir.

         Hi thuthang cu RVA thuthang ih kan ngah mi a si.

https://bit.ly/3MKnHsP