Fatima Bawinu ih puaini sunglawi. May-13

Fatima Bawinu ih puaini sunglawi. May-13

May 13, 1917 a Portugal ram, Fatima khua kiangih Cova da Iria ti mi tlaang ah nauhak te pathum in Tuu an khaal rero. An mah cu Lucia dos Santos le a nau tei pahnih, Francisco le Jacinta pawl an si. Lucia cu kumhra a si ih Francisco cu kumkua le Jacinta cu kumsarih a si.  Cu tiih Tuu an khalh rero lai ah a tleu mawi zet mi Fala pakhat in rin lo paral ah a vun tlet hai. Cui nauhak pawl cun thlisia a ra tiah an ruat ih zamrang thei pa tawp in an Tuu pawl cu inn lam ah an hruai. A voihnihnak tleunak cun a mah hun zoh dingin a tuah. Cu tikah an nih khal in thiil thing parih a ding mi Fala mawi zet an hmu.

         Cui Fala nu cun, “tih hlah uh! Hmai ah ra nor uh,” tiah a ti. Cui Fala nu cu a raang mi kawrfual a hruk ih a kut ah Rosary keng phah in thla a cam. A mah cu Ni hnak in a tleu sawn.  Lucia in cui Fala hnenah cun, “zo na si? Ziang saw na duh?” tiah a sut. Nunau nu cun, “Kei cu Vancungram in ka ra ih thlanga sungah ni hleithum tinten hi tawk ah ka ra theu. Cun October 13 ah mi zate ih an lo zumnak dingah hminsinnak ka lo pe ding,” tiah a ti. Thluasuah nak thawn a khat mi Bawinu cun a thukam cu tha ten a kilhim. Cui nauhak pawl khal in June 13 le July 13 ah Bawinu cu an hmu sal. Ourem ti mi khua ih khuabawi in nauhak pathum hnenih Vancung Fala a langnak cu a zum lo. Cui August 13, zinglam ah cui khuabawi cun Lucia le a unau pahnih hnenah Bawinu an hmu sal ding tiih an zumnak hmuh ih hruai ding vekin a um aw ter.

         Asinan, cu tawk ah hruai lo in palik zungah a feh pi hai ih cu tawk ah cui nauhak pathum cu nihnih sung an um ter. Asinan, Bawinu cu nauhak pawl hnenah ni reipi a langsal. Cui Diocese ih Puithiam pakhat in Lucia hnenah cui langnak thu a sut. Voi ziat saw Bawinu nan hnenah a lang? Ziang tluk rei saw Bawinu nan hnenah a lang? ti le ziang vek hmuihmel a keng? Tiah Lucia cu a sut. Lucia in Puithiam ih a suh mi zaten a sawn theh. Puithiam cun Bawinu in nauhak kpawl hnenah thuthup sim mi a nei ti a thei. Asinan, Lucia cu cui thuthup pawl sim dingah hramhram in a fial lo. Lucia in Puithiam hnenah Bawinu Mary ih a zirh mi thlacamnak malte a rak sim.

         Cui thlacamnak cu “Aw ka Bawipa Jesuh, kan sualnak in ngaithiam awla, Hellram pi thawn in pelh ter aw; Minung hmuahhmuah na Vancungram thleng ter awla na zaangfahnak a cuangcee in a tul mi pawl run bawm aw,” tiih Rosary hmunkhat kan cam theh tinte ih kan cam theu mi thlacamnak kha a si.

         September 13 ah Cova thotho ah Bawinu cu nauhak pawl hnenah a lang sal. October 13, 1917 ah minung thawng sawm sarih cu Bawinu Mary ih a kam mi mangbangza hmuh duh ah Cova ah cun an va feh. Cui ni cu ruah a sur ni a si. Asinan Lucia in cui mipi pawl hnenah an thawng pawl re dingah zangfah a dil ih cu ve ten ruah khal a sur nawn lo. Cu le Bawinu cu nauhak pawl hnen ah a lang. Rin lo paral ah van ih meero pawl khal an hlo ih ni a suak. Mipi pawl khal in meisa tleu ih a puak mawi zet mi cu an hmu. Vangro ih yawng pasarih cu ni in pakhat hnu pakhat a laak. Cui thilcang cu minute pahra sung ah voithum rori a cang mi a si. Cui caan ah ni cu leilungpar ih tla ding vek a bang. Mipi pawl cu an sawn ih an tlu hluah hlo. Curuangah mi hrekkhat in leilungpi a cem tiah an ruat. An kun ih an sual nak hrangah ngaithiam nak an dil ciamco. Rin lo pa ral ah ni cu a um kel in a um sal.

         Cui thil a can lai ah Lucia, Fransco le Jacinta lawng in Bawinu in Naute Jesuh cawi phah in an hnen ih a lang nak cu an hmu thei. Bawinu in nauhak pathum hnen ah Rosary cam ih an nun thleng aw dingah a dil a si. Cu lawng siloin Chapel timi biak khawm nak khaan cu Cova da Iria ih sak dingah a dil. Cui cahpel cu kum 1919 ah a thok a si. Lourdes le Fatima cu Khristian pawl hrang ih hmin thagn bik mi hmun ah a rak cang.

         Kum 1918, December thla ah Francisco le Jacinta an pahnih ten tlangrai nat in nasa zet in an naa. An san lai ah tulai ih kan neih mi siivai pawl an rak nei hrih lo. Francisco ih nat nak cu cuap thling nat nak ah a cang. Francisco cu April 4, 1919 ah a thi ih cui hnu thla rei lo te ah Jacinta ih nat nak khal a besia deuhdeuh. Jacinta cu February 20, 1920 ah a nunnak a rak cem ve a si. Lucia cu kum 1928 ah St.Dorothy kaing ih Sister cang dingah an tlawng ah a rak lut. Asinan kum 1948 ah Portugal ih Coimbra ih um Carmeliter tlawng ah a rak thawn ih Carmelite Sister sinak in a nun a rak hmang. Kan ni khal Francisco le Jacinta tei bang in kan nunram ah Bawinu a tong tu le a nei tu kan si ve thei nak dingah thla in cam sak uh tiah zangfah bawm nak kan dil tlang pei. A tu natsia khal in kan luat thei nak dingah thlaza cam tlang uh si.

#falamrva

#RVAFalam