Mithianghlim Filip Neri (1515-1595)  (May-26)

Mithianghlim Filip Neri

(1515-1595)  (May-26)

Thlacam nak khaan le hnatuan nak khaan (office) pawl rak din tu mithianghlim Philip Neri cu kum 1515 ah Italy ram Florence khuapi ah a rak suak. A nauhak lai ihsin thokin a mah ten a siatsuah aw awl tuk ruangah Pippo Buono ih “mitha Philip te” tiah kawh a rak tuar. A kum 18 ih mangbangza thilcang pakhat a ton hnu ah tha ten ruatcat ta lo in Pathian ih khawkhan nak le lamhruai nak zum in Rome ah a feh. A nun ih a tul mi pawl farah nak thawn a rak um. Thlacam nak cu catbanglo in a rak cam theu. A innteet te ih nauhak pawl ca zirh phah in       tla a rak zirh. A mah cu mifim pakhat a si tengteng ding tiih nemhnget/ruah mi a si. Asinan, rinlo paral ah a ca uk pawl a zuar ih nuncan ziaza lam ih a tlasia tu Rome khuapi ih Pathian hna tuah dingah a rak thok. A mah cu hnihsuak zet mi ruah nak thawn dawr pawl ah a feh ih Pathian ih duhdawt nak thu  a rak phuang. A rak sim theu mi cu,”Ka unau pawl thiltha tuah ding cu ziangtikah kan thok ding,” ti mi hi a si.

           Kum 1548 ah upat tlak zet mi “Bawithumkom Pathian pakhat ih uanu pawl” ti mi pawlkom a rak din. A tumtah mi cu Pathian a biak tu pawl le a dam lo mi pawl hrangih tuan dingah a si. A duh zet mi upat nak pawl sungin Pathian biak nak, tlawng pasarih ih tlawn nak le nazi 40 sung Bawi Jesuh ih Thi le Sa upat nak pek ding pawl an si. Kum 1544 ih Thiang Thlarau puai an sawm zaan ah mithianghlim Sebastian ih a thlaan ih thla a cam lai ah meisa tleu pakhat cu a kaa in a taksa sungah a lut ih a thinlung a tum ter. Hi vek ih thlarau thianghlim thawn a khat ih “a daih zo, aw Bawipa tuar thei nak thazaang ka nei nawn lo,” tiah a rak au.

        A kum 36 ah, thlarau lam hruaitu Puithiam ih thu ngai in Puithiam can nak a rak lak. Cui kum ah Vallicella ih um Santa Maria Biakinn ah “thurelkhawm nak” ti mi pawlkom a rak din. Sualsirtu pawl ih thinlung neh thei nak thluasuah a nei ih mitampi ih nun a thleng ter thei a si. Zinglam hmuahhmuah sualthlah nak a ngai hnu ah thlarau lam lam hruai nakin Pathian thu sim nak a rak tuah. A tamsawn ah cu mithianghlim pawl ih thuanthu a sim. Cu theh in Biakinn pawl ih feh nak a si lole zaan lam ih Pathian Biak nak pawl ah a feh.

             Nikhat ah cu mithianghlim Francis Xavier ih thuanthu a siar theh ah ram dangih Pathian lam sim duhnak thinlung a rak nei. Asinan, a thlarau lam hruaitu Puithiam in feh dingah thazaang a rak pek lo.

           Missa raithawi nakah voi tampi cuti a can nak cu a rei thlang. Kum 1595 ah netabik nak thluasuah a pek ih “ziang hmuahhmuah ih thuluu ah kan za ten kan thi ding,” tiah a rak ti.

https://www.youtube.com/watch?v=QuaM4oMQ02g