Leitlun mipa lakih tar bik cu kum 113 a si ih ni khat ah Rosary vei hnih a cam.

Leitlun mipa lakih tar bik cu kum 113 a si ih ni khat ah Rosary vei hnih a cam.

           Guinness World Records ih tarlang vekin leitlun mipa lakih tar bik cu Venezuela ram ih lothlo in pum a cawm tu Vicente Perez a si ih a kum cu 113 a si. A hlan ahcun Spaniard timi pa hi mipa tar bik a rak si dah nan anih a thih hnu in Perez cu mipa tar bik ah a rung cang mi a si. Perez ih hminpi cu Juan Vicente Perez Mora a si ih, zumnak lam ih tang tha zet mi a si vekin ni khat ah rosary vei hnih a cam theu ti a si. Perez cu 1909 kum, May 27 ni ah a rak suak. A nu le pa cu Eutiquio del Rosario Pérez Mora and Edelmira Mora an si ih fate 10 an neih mi sungin Perez cu nautabik sangtu a si.

        May 17 ni, Guinness World Records website ih an tarlang mi sungah a san saunak thuthup thawn pehpar in hiti’n a rak sim: “hnatuan teimak aw, colhni (holidays) ah tha te’n cawl aw, tuan te’n it aw, nitin te’n aguardiente tiih an kawhmi fu thawn tuahmi zu kha khuat khat in aw, Pathian duhdawt awla na thinlung sungah cam ter ringring aw” ti’n a rak sim. Cun, a innsang le a rualpi pawl ih a hringnun ih komtu tha bik an si ih a nun sung ih a zir ngahmi pi bik cu Pathian ih duhdawtnak, innsang ih duhdawtnak le hnatuan dingah tuan te’n tho ding timi pawl an si a rak ti. 

           Guinness World Records ih tarlang mi vek cun, Perez Mora hi leitlun ih mipa tarbik a si tiah 2022 kum, February 4 ni ah nemhnget a si. Perez Mora cu kum 5 a kim in a pa le a u le pawl hnatuan a bawm; ahleice ih an tuan bik mi cu coffee lak le fu lam pang a si. Kum 10 a kim in tlawng kai a thok nan, ca a zirhtu a dam nawn lo ruangah thla 5 sung lawng a rak kai ngah. Cuih a saya in a nat roh tuk hlan te ah cabu a rak pek ih cumi thawngin Perez Mora khal cu ca siar thiam le ca ngan thiam dinhmun ah a thleng thei.1948 ihsin 1958 tiang cu Caricuena ah sheriff timi bawi dinhmun in hna a rak tuan. Ediofina del Rosario García thawn innsang an din ih 1997 kum ih a thihsan tiang kum 60 sung an umtlang. Fapa 6 le fanu 5 an nei ih tu 41, tusin 18 le tusuan 12 an nei zo.

         An innsang lak ihsin Perez Mora cu a zumnak ruangah hmin nei deuh a si. Pathian thawn siseh, sungkhat unau pawl thawn siseh a hngetkhoh mi pawlkomnak/pehtlaihnak neih duh zet a si vekin ni khat ah rosary vei hnih a cam theu. A tupa Freddy Abreu khal cun CNA thuthang ah, “Ka pu cu daihnak, hnangamnak, le lungawinak tampi thlenpi tu pakhat a si. Pek ding tampi a nei, thil ziangkim ah a lungsi thiam ih Pathian hnenih lungawi tu ringring a si” ti’n a rak sim. Lei tlun ih mi tar bik le nunau tar bik cu French mi Sister Andre Randon a si ih anih cu 1904 kum, February 11 ni ah a rak suak tu cun kum 118 a kim thlang. Tui kum 2022, April 19 ah Kane Tanaka a thih hnu ihsin leitlun mi tar bik dinhmun ih a dinnak khal a si. Kane Tanaka cu 1903 kum, January 2 ah rak suakmi a si.

Ref: CNA News , June 8

https://bit.ly/3OfLC3j