Philippines ram Cebu cozah in Catholic Puithiam pakhat sunloihnak laksawng pek (June 13, 2022)

Philippines ram Cebu cozah in Catholic Puithiam pakhat sunloihnak laksawng pek

(June 13, 2022)

              Philippines ram a laifangnak lam Cebu khuapi ah kandung June 12 ah Catholic Puithiam pakhat hnen ram ih music le ca thangso nak hrang a pum pek nak hrang sunloih nak an pek. Cebu khuapi ih nunphung le thuanthu pawl khawl nak zung ih tuanvo nei tu pawl in Msgr.Rodolfo Villanueva hnen 'The Order of Rajah Humabon' sunloihnak Capi an pek.

              Msgr cu music mifim, ca thiam, thilthiam zet asimi Cebu khuami khal a si. Himi caanserh cu San Carlos Seminiry ah tuah asiih, caanserh ah Cebu Catholic Archbishop Jose S.Palma, khuapi uktu Michael 'Mike' Rama, khuapi uktu bawmtu Donaldo 'Dondon' Hontiveros, Pope aiawhtu Archbishop Osvaldo Padilla, bawmtu Bishop asimi Bishop Antonio Ronola, Msgr. Ruben Labajo, adang Msger le Puithiam pawl khal an tel.

              A tu sunloih mi sunloihnak buaih cu 1994 ah an sunloih thokih, ramthen cozah ih sunloih mi a sangbik buaih tacik khal a si thu, cui laksawng tacik cu ram thansonak hrang zuam zet in a tuan tu pakhat ciar le miphun thleidang loin sunloih a si thu, himi laksawng tacik pek mi Msgr cu kum 82 asiih Renato E.Madrid ngan tu tiin mi theih tam mi a si.

              Amah cu Cebu Archdiocese Puithiam pakhat asiih Visayas le Mindanao ramthen pawl ah mi theih tam mi asi thu, ziangruangahtile biakkhawm thlacamnak ih sak mi hla pawl cu English le Cebu tong thawn a ngan tu khal a si.

              Amah cu Santo.Tomas phunsangtlawng ah English ca  zir ih Master buaih a ngah tu a si. Cutivekin Philippines ram ih a ngah mi buaih pawl hleiah America ram, Minnesota ramthen ih Moscato phunsangtlawng ah music thawn khal Master buaih ngah tu a si.

              Biakkhawmnak lam ih sak mi hla pawl a phuah ih hleiah 1997 ih ca suah mi Devil Wings "khuavang ih thal", 2000 ih a ngan mi Mass for the Death of Enemy "ral ih thihnak Missa", 1996 ih ngan mi Southern Harvest "thlanglam ih lo" hminpek mi cauk a phunphun khal a ngan tu a si.

              Sunloihnak tacik sunloihnak ah pakhat lawng siloin sunloihnak laksawng tampi khal an sunloih. Amah cu music le English pawl kum tampi San Carlos seminary ah a zirh. Cutivekin Silliman ah music a zirh vekin Philippines ih Dipolog le Dumaguete zungih kumkhua pawlkom sungerl khal a sti tiin a sim. Himi thuthang cu RVA thuthang ihsin kan don mi a si.

https://bit.ly/3xxxn2Q