St. Aloysius Gonzaga a thih hlan te ih a Nu hnen cakuat

St. Aloysius Gonzaga a thih hlan te ih a Nu hnen cakuat

         Thlarau Thianghlim ih hnemnak le zangfahnak cu kumkhua in na ta si ringring hram seh law, ka upat duhdawt bikmi Nunu. Na cakuat a ra thlen ah hin, hi thihnak ramah thi thei hrih lo’n ka tang hniaphni lai a si. Asinain, a tu ahcun, a nungmi pawl umnak ram ah kumkhua Pathian thangthat dingah vancung ram lam pan dingin ka thangphawk awk a tul thlang. A ngaingai ahcun, a tu hlan ihsin cutawk hmun rak thleng zo dingah ruahsannak ka rak neih cia zo mi a si lam. Ka duhdawt bikmi Nunu, Paul ih tivek in duhdawtnak timi cu a lungawi mi pawl thawn lungawi ding, a tap mi pawl thawn tap tlang ding ti a si ahcun, nasa tak ih lungawi ding na si. Ziangahtile, Pathian in nangmah a a lo zangfah ih a lo duhdawt ruangah a dikmi nuamnak lamzin i hmuh ih ziang tik hman ah amah ka thlau lo ding timi i fiang ter zo.

        Aw upat duhdawt tlak bikmi Nunu, Pathian ih thatnak timi cu maw, theihthiam thei lo mi le tah theih lo mi tipi thuanthumpi vek a si. Himi Pathian ih thatnak ka ruah tinte’n a maksaknak in keimah le keimah khui ka thleng ti hman thei nawn lo khop in i hruai hlo theu. Caan tawite sung, rel tlak lo te hna ka tuan mi ruangah Pathian in kumkhua colhdamnak hmun ah i ko a si; ziang tlak lo te si hman sehla, ka ti thei tawk te ih ka rak hawl rero mi a cemthei lo mi nuamnak hmun ah vancung ihsin i run sawm ih a for sunmi ka mitthli man pek dingah hi laksawng cu i run kam a si.

         Ka upat bikmi Nunu, Pathian ih ramri nei lo mi a zangfah lainatnak ziangsiar lo ih um pang lo dingin na ralring ding hi ziang dang hnakin ka lo forh duh hleice. Pathian thawn hmaiton ih caan a hmang rero tu hrangah mithi pakhat hrang vekih na tah rero pang a si ahcun, Pathian ih zangfah lainatnak ziang siarlo ah na cang ding ho khaw. Pathian thawn hmaiton ih a tlangleng rero tu ih thlacamnak pawl cu, harsatnak na ton rero lai caan khal ah leipar an um lai ih an lo bom thei hnak in hmual a nei sawn timi khal hi thei hngilh hlah aw maw. Cule, kan thenawk hi a rei lo ding ho khaw; a rei hlanah vancungram ah kan tongaw sal ko ding; in Rundam tu thawn pumkhat ah kan cang dingih kan thinlung ruahnak zate thawn amah cu kan thangthat ding; a zangfahnak thangthat phah in kumkhua nunnuamnak cu kan cen tlang leh ding. In pek cia mi thil pawl Pathian ih in laksak sal tikah, kan ro sunglawi kha a him sinsin nak hmun ih retsak in duh ruangah a si theu; cule, kan hril duh bik dingmi thluasuah pawl pek in duh ruangah khal a si theu.

         Ka duhdawt bikmi Nunu, hi cakuat pawl na hnen ih ka ngan nak san cu, kan innsungsang zate’n ka fehsung nak parah lungawi hnangam ih nan um ding ka duh ruangah le, kan ruahsannak phunkim a famkimnak hmun, tiva ral ah tluang te le zamrang te ih ka thlen theinak dingah Nu pakhat dinhmun in thluasuah i pek ding ka duhruangah a si.   Cule hi cakuat ka nganmi hi thinlung tak rori ih ka nganmi a si; ziangah tile, hi cakuat ngan ti lo bak cu na fapa pakhat dinhmun in duhdawtnak le upatnak langter dingnak dang ka thei nawn lo.

                                      Na duhdawtmi na hrinhniang, Aloysius Gonzaga

Tuitum ah himi St. Aloysius Gonzaga ih cakuat kan run tarlang duhnak san cu, St. Aloysius Gonzaga vekin tui tum pulhnat a karh lai fangah, maih sungmang le lungthlitum pawl tanta tahrat in mina pawl hrangah pumpe ih maih nunnak tiang a thap tu pawl upatnak pek kan duh ruangah a si. St. Aloysius Gonzaga hi Siangbawi dinhmun in mipi rian a duh ruangah siangbawi tlawng kai rero mi a si ih, rinlo pi ih pulhnat a tlun tikah cuih pulhnat ih namnuai mi mina pawl rian dingah a pum a pe aw ih, amah lala khal cuih pulhnat thawn amaih lungthlitum Siangbawi cannak hman ngah man lo’n 1591, June 21 ah a nunnak a rak liam. Cule, 1726 kum ah Mithianghlim dinhmun ih khaisan a si ih, 1729 kum ah Pope Benedict XIII in mino pawl kilkhawitu Mithianghlim timi hmin a rak pek. Atu ahcun amaih thihni June 21 ah kumtin sunloih a si theu. A rak ngaitu nan zate’n St. Aloysius Gonzaga ih thlacam sak nak thawngin tuitum ih pulhnat ihsin luat thei cio dingah Bawipa’n lo thluosuah hram seh! Amen.