Mithianghlim Peter and Paul thu tawi relnak le simnak.

Mithianghlim Peter and Paul thu tawi relnak le simnak.

June 29, 

         Dungthluntu pawl lak ih upa a si mi Mithianghlim Peter cu Bethsaida ram ih suak mi nga kaitu a si. Bawi Jesuh ih kawhanak a ngah hnu ah leitlun ih a thilri hmuahmuah tanta in a thlun. Cui thu cu Mak 1:17 sungah kan hmu thei. Sisaria Filipi peng ah Bawi Jesuh I a hmin cu ‘lungto’ ti duhsan a nei mi “Peter” tiin a hmin a thleng sak ih ‘nang cu Petru na si; hi lungto parah ka kawhhran ka ding dingih thihnak hman in a neh thei dah lo ding.’ Cui catlang cu Mt 16: 18 sungah kan hmu thei. Peter cu Bawi Jesuh ih kiangah catbang loin a rak um nan voithum rori a rak phatsan. Bawi Jesuh khal in Peter ih duhdawtnak langter dingah voithum a rak sut. Cui thu cu John 21: 15 sungah fiang zet in in sim a si.

         Peter in Bawi Jesuh Vancungram a kai hnu Judah ai-awh tu ih Mitthias cu dungthluntu ih an hril lai ah Bawi Jesuh cu Messiah a si thu ngam huai tak in a rak aupi. A thlacam saknak in suahkeh kezeng pa pakhat a dam ternak thu cu Tirhthlah 3:5 ah le Tirhthlah 10:44 ah mangbangza thil a rak cang. Kum 64 ah Nero Siangpahrang in Pawlpi a hrem caan ah Peter cu Vatican tlang parah a linglet in Thinglamtah ah an rak thlai.

         Jew miphun a si lo mi pawl ih dungthluntu Mithianghlim Paul cu Tursus khuapi ih mi mawh a phurh duh zet tu Farashe pakhat a si. Damascus khuapi ah a nunnak a rak thleng tiin Tirhthlah 9: 18 ah kan hmu thei. Neta lam ah Asia le Greek ram pawl ah bang zet in Pathian thuthangtha a rak phuang ih Pawlpi tampi a rak din. Cui Pawlpi cu Mithianghlim Paul ih pek mi ca ti mi hmin thawn thukham thar ah a tel mi ca pawl ah an ngan.

         Jerusalem ih a netabiknak khual a tlawnnak ah a miphun pi Jew miphun pawl in an kai ih “Pathian hmin dodaltu” tiin mawhpuhnak a rka tuar. A mah cu rome mi sinak latu a si ruangah hi thu cu ram uktu Siangpahrang ih rel cat dingin an rak dil. Rome ih thawng a tlak lai ah, “Ka thih caan a cuu zo. A tha zet mi raldonak ka tuah zo ih tlan zuamawknak ah ka ti thei patop in ka tlan zo. Zumnak khal thlauthla lo ten ka pom hnget zo” tiah 2 Timote 4:4, 6-7 sungah a um a si.

         Kum 64 ah lutan a rak tuar. Constantine Siangpahrang in upat tlak zet mi dunghtluntu pahnih an phumnak parah a tum zet mi St. Peter le St. Paul biakinn pi a rak sak.