Canterbury ih Mithianghlim Augustine (May 27)

Canterbury ih Mithianghlim Augustine (May 27)

          Canterbury ih a hmaisabik bishop a si mi mithianghlim Augustine cu Rome khuapi ih um Andrew Puithiam tlawng ih Puithiam pakhat a si. Kum 596 ah mithianghlim Augustine cu a rualpi 30 thawn England ram ih Pathian hna tuan dingah mithianghlim Pope Gregory in a rak thlah hai. Kent ih an um tik ah Siangpahrang Ethelbert in thiil rah tang ah a um ter. Ziangah tile dawithiam pawl an um ding a phan ruangah a si.

            A tha zet mi an tumtah nak pawl a thei ih a lungkim tu Siangpahrang in Canterbury ah um nak hmun a pek ih rem an ti nak hmun ih Pathian thuthangtha phuang thei nak thu a rak pek. Minung thawng za leng lo in Christian zum nak cu an pom ih kum 597 ah Thiang Thlarau puaini ah siangpahrang a mah rori khal in tikholh nak a rak lak.

             Pathian thu sim tu pawl in Pope thawn an biak awk ringring ih “a sang nak ih a kai duh tu pawl cun nuam te ten an kai tul, dop tahrat in lan a ngah lo,” ti mi Pope ih ruah nak tha pek mi cu an thlun. An mah cu khuavang a biak tu pawl ih an biakinn pawl bal sak lo in cu mi pawl cu Christian biaknak hrangah an ret ih Pathian zum lo tu pawl ih an puai pawl ai ah mithianghlim pawl ih puai an hmang. Mithianghlim Augustine in Canterbury ah biakinn pakhat le St. Peter le St. Paul hmin ih ap mi Puithiam tlawng a rak sak. Kum 605 ah a nun nak a cem ih cui caan ihsin thok in England ram ih Vancungmi tiah upat nak an rak pek.