Mithianghlim Aloysius Gonzaga (June-21)

Mithianghlim Aloysius Gonzaga (June-21)
Mithianghlim Aloysius Gonzaga cu mino pawl bawmtu mithianghlim a si. A mah cu kum 1568 ah Italy ram Mantua kiang ah hnam sang a si mi Gonzaga sungkua in a rak suak. A pa ih tumtahnak pawl diriam nak dingah Aloysius cu ralkap tindan a rak zir ih ral do thiam nak ropi zet mi zaan riah ei nak ah a rak tel ve
A mah cu a hnamsang pawl ih kiangkap ih a tha lo mi ziaza le nun can sia pawl a rak beidong ih zum nak ih a hngetkhoh mi nunnak ih a um duh nak thinlung cu a rak karh. Rawl le tidai cu zarh khat ah voithum a rak uul ih a mah le a mah funghreu thawn a rak vuak awk.
Zaanlai ah a it nak in a tho ih lungto par ah khuk bil in thla a rak cam. Thi tha lam ih sual nak ih thianhlim nak kilhim thei nak dingah tanglam lawng a zoh. India ram ih Jesuit kaing sung ih Pathian hnatuantu pawl ih an hmuh ton mi an ngan mi ca uk a siar theh hnu ah a mah khal an mah sung tel ve dingah a thinlung a rak bot cat.
Kum 1585 ah a pa in nasa zet in a lung a kim lo nan a ro cu taan tahrat in Rome ih um “Jesuh kaing” ti mi ah a rak lut. Thla ruk a rei ah a pa cu Jesuih taang ah hnangam ten a rak cawl. A Fapa in a tlan san hnu ihsin thok in a nun a rak thleng.
Mithianghlim Aloysius cu midik si nak ih zohthim tlak a si. Mah le mah uar awk nak ih harsat nak pawl hmu in a niam bik mi tuanvo pawl tuan dingah le rawl suan nak ih tuan dingah caan tha a rak dil.
Kum 1591 ah Plague pulh nat caan ih mina pawl a kilkhawi phah in a mah khal nat suan a tuar ih a nat hnu thlathum ah a nunnak a rak cem a si. A thih ah a kum 23 lawng a si lai. A nu hnen ih a kuat mi netabik ca ah, “hmaiton ten Pathian biak nak caan tha a ngah zo mi a thi zo mi pakhat hrangih tah nak in Pathian ih duhdawtnak ziangsair lo in um hlah. Kan then awk nak hi kumkhua ih thenawk nak a si lo, pakhat le pakhat Vancungram ah kan tongaw sal ding,” tiah a rak ngan.
St. Aloysius cu milian, phunsangfa a si ko nan, an sungkua ih a tha lo mi ziaza pawl, leipar thiam nak, si nak le mawi nak pawl tan san in Pathian ih duh nak thlun dingah an sungkua dinhmun a rak tanta tu mithainghlim a si.
Pathian duh nak hawl in lei par ih thil hi ziang an si lo zia a hmuh hnu cun Bawipai hnenah thinlung le pum zate pe dingah a nun a rak hmang tu mithianghlim a si vek in kan nih Christian unau zate khal Bawipai duh nakhawl tum tlang uh si. Lei par si nak le hminthan nak hnak in kan Pathian hril tlang thei dingah zaangfah bawm nak dil tlang uh si.