Dungthluntu Mithianghlim Thomas (July-3)

Dungthluntu Mithianghlim Thomas (July-3)

          Inn pungsan a suai tu pawl kilkhawitu Mithianghlim Thomas cu Galile khuapi ih mifarah sungkua ih suak mi a si. Bawi Jesuh par ah duhdawtnak hngetkhoh zet in a nei ih a mai hrangih teette khaan dingah a thinlung in duhnak a rak nei.

          Asinain, Bawi Jesuh a thih hnu cun dungthluntu pawl hnen in a dang ten a um ih ‘Bawi Jesuh a thosal zo’ ti mi thuthang a rak zum lo. Curuangah “rin hleh tu Thomas” ti mi hmin a rak ngah.

          Bawi Jesuih langnak an hmuh hnu zarhkhat a rei ah a voihnih nak langnak an hmu sal ih Thomas hnenah “hi nah na kutzung rak ret hnik aw la, ka kut hi zoh hnik aw. Zum lo in um nawn hlah,” tiah a rak sim.

          Thomas khal in, “Ka Bawipa le ka Pathian” tiah a rak ti. Cu le Bawi Jesuh in “Nang cu I hmuh ruangah I zum. Kei mah I hmu lo nain a zum tu cu mi thluasuah a si,” tiah a ti. Cui thu cu John 20:24-29 sungah kan hmu thei.

          Thiang Thlarau a rung tum hnu ah Thomas cu an kai ih India Siangpahrang Gundafor hnenah sal dinhmun in a ra thleng tiah hlan thuanthu in kan thei thei. Innruang zing nak ih a thiam thu a theih ruangah Siangpahrang in Thomas cu a ropi zet mi Siangpahrang hauhruang a rak sak ter. Siangpahrang um lo sungah Thomas in a ngah mi peisa hmuahmuah cu mifarah pawl a rak pek theh.

          Siangpahrang a thleng sal ih a sak ter mi Siangpahrang hauhruang thu a suh tikah Thomas in, “Siangpahrang Bawipa, cui Siangpahrang hauhruang cu a tu ah nah mu lo ding. Hi leiram na suah san hnu lawngah na hmu ding,” tiah a rak ti.

          Cu tikah Siangpahrang Bawipa cu a thinheng tuk ih a mah cu nung cing in a vun hawk dingah thu a pek. Asinan, Siangpahrang ih hnatuan a sawng tu in “Thomas in vancungram ah Siangpahrang ih hrangah Siangpahrang hauhrung an timtuah mi langnak ka hmu” a ti ruangah a nunnak a zuah sal.

          Siangpahrang in Thomas a thlah ih mitampi thawn Baptism an rak lak. Neta lam ah Thomas cu India lam ah a feh sal ih Pathian thuthangtha a rak phuang. Cui hnu ah Mazday ih Siangpahrang Bawinu cu a nun a rak thleng ter thei ruangah Siangpahrang Bawipa thawn an rak rem aw lo. Netabikah tlangzim hmunkhat ah an hruai ih cui hmun ah thah a rak tuar.

          Mithianghlim Thomas cu India ram ah Pathian thu a phuan phah in a nunnak a rak liam nak in mipi tampi zumnak ih a rak hruai suak thei tu mithianghlim a si vek in kan nih khal kanmai dinhmun cio ah thuthangtha phuangtu si ve tum uh si. A mah bangin hmundang, ramdang feh in Pathian thuthangtha sim thei lo hman sehla kan innsang le kiangkap ah Jesuh khrih kan nun in phuang tlang tum uh si. Mithianhlim Thomas cu Jesuh khrih ih thawhsal nak zum lo in a rak um ko nan neh hnuah cun a mai hrangah a nunnak tiang liam in a rak thlun bangin kan nih khal zum nak der lo in hngetkhoh zet ih kan um thei nak dingah thla in cam sak aw tin zaangfah bom nak dil tlang uhsi.