Mother Teresa (September-4 )

Mother Teresa (September-4)

 

1.      Mother Teresa cu kum 1910, August 26 ah Yugoslavia peng, Skopje khuapi ah a rak suak. Baptism (Tikholhnak) a ngah mi hmin cu Agnes Gonxha a si. A mah cu Gonxha tiin mi tampi ih theih mi a si.

          Gonxha ti mi ih duhsan cu hninsi (Rose) mum te ti nak a si. A nauhak lai ah cun a thauih, a hmel ceengin le hnipuan felfai zetih hru tu khal a si.

2.      A pai hmin cu Nicolas a si ih a nu cu Drana a si. A unu cu Aga a si ih a u pa cu Lazar a si. An innsungsang cu zohthimtlak zet mi innsang an si.

3.      Agnes cu kumkua a ti ah a nu le pa in an thih san. Ziangtluk in a rak riahsia ding ti ruat ve uh si. Ziangti zawnghman in an rak hnem thei lo.

4.      A nu cu puanthaan par ih pangpar thitnak a rak thiam zet. A mai zapayua le a kawr hlum pawl thit nakin an innsang a rak cawm. Hi vek in sumpai ngah dan a um ruangah an innsang hrangah a rak kaih nasa.

5.      Agnes cu ca siar a rak paih zetih Puithiam hnenin ca uk pawl a rak ngah theu. Puithiam in India ramih um Bengal ram thu a hmaisabik ih thei dingah a rak bawm.

6.      Bangal ram ah a fehih cui hmun ih farah pawl bawm dingah thinlung duh nak a rak nei. Bengal ram ih feh dingah a tumtah mi cu a nasa vivo. Bengal ram cu a um nak inn ih a cannak nak ni ah a thleng leh ding.

7.      Bengal ram cam ih mithat nak a tuantu Loretto kaing (Congregation) ih Sister pawl thawn ca in peihtlaih awk nak an rak nei thei. Bengla peng ih fehnak khal a rak thei. Cui ram ih dinhmun thuhla khal a rak zingzoi.

8.      Agnes cu Loretto Sister pawl kai ih lut dingah a thinlung a rak bot cat. Curuangah  Ireland ram ah a feh. A innsang pawl in Zacchaeus khuapi ih um tlangleeng cawlh nak hmun tiang an thlah.

9.      Agnes cu Ireland ram ih um Loretto kaing, Sister tlawng ah thlaruk sung mirang ca a rak zir. Cui hnu ah India ram Kolkata khuapi ah tangphawnglong thawn a rak feh. Cui caan ihsin thok in Kolkata khuapi cu a um nak inn ah a rak cang.

10.    Kolkata ih Sister cannak ding tlawng ah Sister cang dingah tindan kai dingin Himalaya tlang thuai ih um Darjeeling khuapi ah tlangleng thawn khual a rak tlawng. Cui hmun ah Pathian biak daan pawl le ziang vekin Pathian duhdawt ding ti vek thu a rak zir.

11.    Sister cannak ding tlawngah kum hnih rei a rak kai ih Sister ah a rak cang. A mah cu Sr. Teresa tiah an ko. Cu ve ten Interling khuapi ih um St. Mary tlawngah tlawngta pawl fimthiamnak zirh dingah an rak thlah.

12.    Sr. Teresa cu St. Mary ca zirnak tlawngah ca zirh phah in cui tlawngih tlawng uktu Sayama Gyi ah a rak cang. Kum 17 tiang rori cui tlawngah a rak tuan. Sr. Teresa cu ca zirh a rak peih zet. A tlawngta pawl cu duhdawtnak thawn a rak kom.

13.    Sr. Teresa cu ca zirh nakah thiam hleice in a zirh ko nain a zirh dan a lungsi thei lo. An ca zir nak tlawng leng lam, mifarah vengih ca zir thei lo mi mipa nauhak pawl le nunau pawl an um kha a vun thei dukdi.

Pathian ih thil ti thei nak a pek mi cu cu vekin mifarah nauhak pawl bawm nak ding a si                                                                                                                                                                                                                                                                                                                                                                                                            thu a vun ruat. Asinain, cui caan ah cun a lengah pot tahratin mipithat nak hrangih hnatuan an rak on lo.

14.    Kum 1964, September 10 ah a nun ram ih hnatuan a thar pakhat a thawh nak ni a rak thleng. Cui ni rori ah Darjeeling khuapi ah tlangleng thawn khual a rak tlawng.

 Cui caan ah "St. Mary cazirnak tlawng tanta in mifarah vengah feh awla hnatuan aw" tiin Pathian hnen in aw pakhat a rak thei. A mah in cui ni cu, “Pathian ih tha pek nak, kawh nak pakhat a ngah nak ni,” tiin a rak sim theu.

15.    Pathian ih kawh nak a ngah mi a taktakih hmang dingah Kolkata khuapi ih tuanvo nei tu Bishop hnen in lungkim nak a rak ngah. Bishop in thluasuah a pekih a tul mi bawm nak pawl a rak pek.

16.    Kum 1948, August 16 ni ah Loretto Sister kaingin a rak suak. A angki hrang ah vanrawng pianzia a nei mi a paawl ih a tial mi pathum a tel ih kehlam a liang ah thinglamtah zuk a tel mi Bengal ram ih um India nunau pawl ih an hruk mi Sari kawr rang a rak hril.

17.    A mah cu mifarah veng ih um farah harsa pawl le mina pawl ih thathnemnak hrang tuanding a rak huam. Hi hnatuan tuan nak ding hrangah nurse tindaan kai a tul thlang. Curuangah Patna khuapi ih um thianghlim innsang sizung ih nursing kai diangah a thinlung a rak bot cat.

18.    Sr. Teresa cu nurse tindan a kai theh ah Kolkata khuapi ah a feh sal. A mah cu mifarah pawl um nak Motigi veng ah a thleng. Cui mifarah veng ih nauhak pawl cu a rang yaung Sari cu hruk in an hnen ih a leng tu Sr. an hmuh tikah an lungawi tuk.

19.    Sr. Teresa in nauhak pawl ziang ruangah tlawng nan ret lo tiih an nu le pa pawl a suh tikah a nih in tlawng kai man kan pe thei lo ih nauhak pawl tlawng an kei lo thu an rak sim. Sr. Teresa in "Kei mah rori in ca ka zirh ding. Thaizing in thok in nauhak pawl ka hnenah rak kuat uh" tiah a rak sim.

20.    A thaizing ah Sr. Teresa in nauhak panga thawn ca zir a rak thok. Nauhak pawl cu thingkung tang ah a tongaw ter hai ih Bengali ca ngan thiam, siar thaim dingah leilung par ah cangan dan hmuh in a rak zirh.

21.    A thaizing voikhat ah putar pakhat in caan reipi ding in ca a zirh kha zoh in zaangfah lainak nak thinlung thawn a to nak dingah to nak khung pakhat a rak pek. Sr. Teresa in a lungawi thu a rak sim.

22.    Mi hrekkhat cun a hnatuan nak hrangah sumpai thawn an rak bawm. Cui paisa thawn beu nak inn pakhat a rak sang ih cui hmun ah ca a rak zirh. Cui hmun cu nauhak pawl nisa le ruah tuar nak in a rak humhim thei.

23.    Cutikah Mr.Micheal Gomes timi in a umnak ding khaan pakhat a rak pek. Lungawi zet in cui khaan cu a rak cohlang ih cui khaan ah a um. Thil tumpi pawl cu thil fate in a thok a si lo maw.

24.    A tlawngta pawl cu 100 an kim cuahco ih a inn san mi ah an tleng nawn lo. A mah bawmtu ding a rak hngakhlap nasa. Culaiah Supersenidox timi a tlawngta nu pakhat in ca zirh bawm dingah a rak thleng. Supersini ih a hmin thar cu Agnes a si.

25.    Ni rei lo te ah Magdalene Gomes timi fala nu pakhat cu a mah bawm dingah a rak thleng. A tui caan ah Teresa cu Motigi vengah a mah te lawng feh tul loin an pathum in an feh thlang ih ca an zirh theu. Supersini le Magdalene pawl cu Sr. Teresa hrangah a hmai sabik a dungthluntu pawl an si.

26.    Rei lo te ah Sr. Teresa ih a hnatuanpi a dungthluntu pahra tiang an rak karh. Cui mi a thei tu Mr. Micheal Gomes in amai um nak inn ih inn that thum nak cu an mai hrangah a rak hlu bet. 

27.    Sr. Teresa hrangah mifarah nauhak pawl bawm dingah pawlkom sungtel minung 20 hrawng a tel mi volunteer pawl an kim. Sr. Teresa in hi pawlkom cu Sr. kaing ih din dingah a duh. Sr. kaing din ding le kaing ih thlun ding daan pawl nemhnget dingah kolkata khuapi ih Archbishop ih lamhruai tu Fr.Vanitzin timi in hi thu hla ah a rak bawm.

28.    Sr. Teresa in a rak din mi Sister kaing cu "duhdawt nak thawn pumpek awk ih Pathian hnatuan nak (charity) Sister kaing" tiah hmin a rak pek. Kaing sung ih thlun ding daan cu a dungthluntu pawl in an tuah daan kel ding mi thukam nak pawl thianhlim nak, farah nak le thungai nak ti mi pathum hleiah a pali nak thukam nak ah “a farah bik mi mifarah pawl hrangah thinlung le taksa tel in zalen zet ih pumpek awk nak” khal an telh.

29.    Kum 1950, Oct 7 ni ah Kolkata khuapi ih Archbishop in Sr. Teresa um nak Sr. tlawng ah a feh ih "duhdawtnak thawn Charity timi Sr. kaing din dingah mipi theih in thu pek nak ca a rak pek. Sr. Teresa cu a lung a rak awi tuk. Kum reipi hnu lawng ah a saduhthah a rak kim thei. Tu ah cun Mother Teresa tiin an ko.

30.    Mother Teresa in a thi zik te mi pakhat a hmaisabik a rak bawm thu cu hi tin a rak sim. Nikhat ah keimah cu cozah siizung hmai ih lamzin par ih a thi zik te mi nu le pa nei lo nupi no te pakhat ka rak tong.

Amah cu siizung ah ka hruai nain tuanvo neitu pawl in an rak cohlang lo. Nan tuamhlawm hlan lo siizung in ka tlan lo ding ka ti hnu lawngah an cohlang sal ih cu nui nunnak cu an rak run thei.

31.    Kei cu a bang aw mi dinhmun pawl ah nu le pa nei lo tu pawl ih nunnak ka rak run. Asinain, cui san ih acozah siizung pawl thawn pehpar in ka lung si thei lo.

Curuangah Motigi veng ih ka san mi inn ah mina pawl ka rak kilkhawi. Cui innte cu mina pawl thawn a khat tuk ruangah ralkap upa pawl le veng ih harhdam nak cektu bawi hnenah feh in a tul mi bawm nak ka va dil.

32.    Harhdam nak cek tu bawi in Hindu biak nak Kalighat tlawng kiang ih a lawng mi rawl dawr khaan pahnih a rak pek. Cui dawr khaan pahnih cu aipuang zetin ka rak co hlang.

 Ka rual pi Sister pawl in cui khaan pawl cu an thianfai ih Motigi veng ih mina pawl cu hmunthar ah an rak thawn. Hi inn ah kei mah dinhmun in ka tuah sak thei mi a tha bik mi tuanvo cu mithi zik te pawl le mifarah bik mi pawl hrangah a si.

33.    Kalighat tlawng ih tuanvo nei tu upa pawl in an tlawng kiang ih mi thi zik te kilkhawi nak inn a um kha an lung a kim lo. Nikhat ah a phunphun in in kawk ih hlei ah lungto thawn kan inn an run deng ih keimah thah duh ah in hro.

A leng ah ka pot ih "keimah thah nan duh le in that uh. Asinain, hi mifarah harsa pawl cu hnangam ten thih nak caan tha pe uh" tiih ka ti hnu lawng ah an zaten an tlan thluh.

34.    A thaizing ah Sister pawl cui hmun in a dawi duh tu misual burkhat an ra thleng la la. A pawlkom hohatu in Sister pawl ih mina pawl an thianfai dan pawl zoh in a thinlung a rak thleng ih a rualpi pawl a rak hringhro.

          "Nan nu pawl, nan naunu pawl in hi vek in mina pawl fih lo ih kilkhawi dingih nan tuah thei ding a si le tu ni rori ah Mother Teresa le Sister pawl hi hmun in ka lo dawi sak ding" tiih a ti hnu lawng ah cu pawl cu an tlan hlo thluh.

35.    Ni a rei deuh hnu ah cu hat tlawng ih naat saya cu nasa zet in a na ciamco. TB nat nak a neih ruangah ziang vek siizung hman in amah cohlang ih tuamhlawm an paih lo.

 Netabik ah cun kan siikhaan ah an rak keng ih kanmah in kan rak kilkhawi. Kan mai kut sung rori ah hnangam ten a rak thi. Kan duhdawtnak a hmutu naat tlawng ih tuanvo nei pawl cu kan rualpi pawl ah an cang.

36.    Mother Teresa ih Sister kaing cu kum 1950 ah Pope in a rak nemhnget. Kum hnih sungah Sister 28 an rak thleng ih Mr. Micheal Gomes ih a rak hlu mi innkhaan ah an thleng aw nawn lo.

Curuangah inn dang pakhat an hawl. Fr.Vanitzin in a rual pi Muslim hnenah bawm nak a ral dil ih khuapi vel nak lamzin kiang ih inn pakhat a rak hlu. Cui inn cu kan kaing hrangah kan ruuninnpi ah a rak cang.

37.    Hi inn cu Sr. kaing hrangih zung ah a rak ret. Sr. pawl in Kolkata khuapi ih um lamzin pawl cu an inn in an feh ih an tlun sal ah an cawl. Tu ni ah leitlun hmunkip ih Sr. pawl cu thazaang le hnem nak ngah nak ding ah hi inn ah an feh theu.

38.    Mother Teresa ih upat tlak bik mi a hnatuan cu mi menmen pawl hnatuan pelh lo in phar nat nei pawl kilkhawi nak a si. Voikhat ah a rualpa pakhat in dollar taankhat in pe khal aw la pharnat a nei mi cu ka kut zung khal in ka tham lo ding" tiah a rak ti dah.

Cutikah Mother Teresa in "kei khal dollar taanhnih in pek khal le ka tuan lo ding. Asinain, Pathian ka duhdawt ruangah hi thil pawl ka tuah nak a si"tiah a sim sal.

39.    Mother Teresa in Kolkata khuadeng ah pharnat in a dam zo tu pawl um nak dingah Shanti Nagar timi khua pakhat a rak din sak. An mai hrangah inn 200 luan a rak sak sak. An mah pawl cu kutthiam pawl thawn an pum an cawm aw.

40.    Nu le pa neilo pawl kilkhawinak cu Sr. pawl ih a dang hnatuan pakhat a si. Lamzin ih an hnon mi naute pawl an rak kilkhawi. India ram lawng si lo in Sr. pawl ih an tuan nak khua le ram pawl ah nu le pa nei lo pawl ih um nak tlawng pawl an rak din.

41.    Mother Teresa ih Sr. kaing cu Bishop ih kutthuai ih um mi Diocese thawn pehpar mi Sr. Kaing a si ruangah India ram leng lam ih Pathian hnatuannak a um hrih lo.

 Asinain, Mother Teresa ih Sr.Kaing ih tuanvo cu Venezuela ram le a dang ram pawl in an dil. Cutikah kum 1965 ah Sr. kaing cu Pope thawn pehpar mi Sr.Kaing ah nemhngek in an rak than.

42.    Mother Teresa in thlanglam America continent sak lam ih um Venizuila ram ah Sr. tlawng thar ding a rak duh. Cui ram ah zinan a suak ih lungmankhung laih nak a um.

Mother Teresa in Sr. pali cu cui hmunih um mifarah pawl zoh tha dingah a rak thlah. An mah cu midang that nak hrang hnatuan cu Corote khuate pakhat ah a rak thok.

43.    Pope a mah rori in Rome khuapi kiang ih um Dorphy Scar veng ih um mi mifarah pawl ih that nak tuah dingah Mother Teresa a rak sawm ko. Pope ih sawm nak cu a rak cohlang ih 1968, August 22 ni ah India ram leng, Rome khuapi ah a pahnih nak Sr. tlawng pakhat a rak din.

44.    Austrilia ih Archbishop Robert Ness in Mother Teresa ih Sr. kaing cu Pope ih kut hnuai ih um Sr. kaing si dingin a bawm. Archbishop in Australia khal ah Sr. tlawng din dingah a sawm ruangah Mother Teresa a mah rori a feh ih, 1969 ah Australia ih um New South Wales khuapi ah Sr. panga thawn Sr. tlawng an phuan ih Aadivasi miphun pawl lakah hnatuan an rak thok.

45.    Voikhat ah rinsan ding nei lo putar pakhat a rak hmu ih a khaan a rak thianhmin sak. A khaan sungah hman lo ih ret men mi meiinn pakhat a hmu ih "ziangah meiinn na hmang lo" tiih a suh tikah, a nih in "zo hrangah ka vang ding. Zo in so i ra zoh dah ih, a thim zet mi keimah lawng umnak ka nunram cu hi meiinn in i hlon hlo sak thei ding maw" tiah a rak ti.

46. "Sr. pawl na hnen ih an ra lo len le hi meiinn rak vang aw" tiah Mother Teresa in a rak sim. Cui hnu ah Kolkata ah a tlung sal. Thlathum a rei hnuah putar pa hnen in cakuat pakhat a rak ngah. Ca sungah cun, "Bawinu ka lungawi tuk, ka khaan cu na tleu nak thawn a khat ringring" tiah a rak ngan.

47.    Africa ram ih um Tanzania ram ih Bishop pakhat in Mother Teresa cu Tabor khuapi ih um mi pharnat neitu pawl hrang tuan dingah a rak sawm. Cui hnatuan ih tindan rak kai tu Sr. Shanti a rak thlah.

 A mah in pharnat nei pawl hrangah an um nak hmun pawl thianfai nak pawl a tuah sak ih hlei ah thinlung tak in a rak tuan. Pharnat nei pawl a zoh nak ruangah Noble Prize pek tlak zet mi a si.

48.    Kum 1963 ah Mother Teresa in pawlkom hnatuan a tuan peihtu mipa pawl hrangah Bro. tlawng a rak din sak. Bro. Andrew ih hoha nak thawn India ram ah tlawng 32 tiang a rak karh.

Tui ni ah Brother pawl cu Vietnam, Cambodia ram, thlanglam America, American ram le Africa pawl ah hna an rak tuan. An mah pawl ho tu cu Bro. Giles a si.

49.    America ram cu milian ram a si ko nain Bro. pawl ih hnatuan nak an tul. Mah te lawng um tu, zuu in pawl, AIDS nat nei pawl cu California ram Scatro khuapi ah hmuh a theih. Bro. pawl in an nat nak cu siizung pawl ah siivai thawn an tuamhlawm ih hleiah duhdawtnak thawn dam nak an rak pek.

50.    New York khuapi ah AIDS nat besia zet in a tuar tu mino pakhat in Mother Teresa hnen ah hi tiin a rak sim. Lu na ka tuar caan ah Bawi Jesuh ih hling lukhuh a khuh nk ih hliamhma ka tuar ve. Ka zaang ih nat nak ka ton tikah Bawi Jesuh thuam ah hridai thawn an hreng ih an vuak nak ih hriamhma ka tuar. Ka kut pawl an nat caan ah Thinglamtah par ih Bawi Jesuih hriamhma pawl ka tuar, tiin a rak sim.

51.    Mother Teresa in Sr. a si lo mi a leng ih mina pawl bawm thei dingah pawlkom pakhat a rak din sak. Tu ni ah hi pawlkom ah minung ting 40 luan an tuan thlang.

An nih in an um nak hmun le ram cio ah Pathian hna an tuan. Mi hrekkhat cu Kolkata ah an feh ih Sr. pawl ih nu le pa nei lo pawl le mi thi zik te pawl an kilkhawi nak ah an bawm.

52.    Voikhat ah Hindu pakhat a si mi a rualpi pakhat in mi thi zik te pawl an kilkhawi nak inn ah a va leng ih kum upa zet mi putar pakhat thinsau zet ih an kilkhawi nak cu zoh in a uar tuk ih Mother Teresa hnenah hitin a rak sim.

          Kei cun Pathian zum nak ka rak nei dah lo. Midang parah lungkim lo nak ka nei. Asinain, tu ah cun Pathian ih duhdawtnak cu ka mit in kei mah rori ih ka hmuh ruangah ka lungawi tuk ti phah in cui hmun in a feh san.

53.    Ms. Annbalik ti mi nu cu England ram in Mother Teresa ih hnatuan pi mi a si. A sungkua pawl thawn Kolkata khuapi ah an um ih puanthaan par ih pangpar thit nak lam ah a peih zet.

A mah cu Mother Teresa ih midam lo pawl, pi tar, pu tar, nu le pa nei lo tu pawl hrangih an tuah sak mi a rak uar zet tu khal a si. An mai hrangah hnipuan pawl a hlu ih a rak bawm. A mah cu England ram ih a tlung sal ah mifarah pawl bawm nak pawlkom a rak din.

54.    Ms. Annbalik cu Kolkata khuapi ih a um lai ah zarhkhat voikhat mifarah pawl um nak veng ah Mother Teresa thawn an feh tlang theu.

 An len lai ah nikhat ah cu mino pakhat in upat nak a va pek. Mother Teresa in a kut in a vun tho ih zo na si tiah a rak sut. A nih in, “Ka thih zik te dinhmun ah hi tawk ah ka rak thleng.

 Sr. pawl in siivai thawn in tuamhlawm ih nunnak in pek. Tu cu nupi ka nei thlang ding. Curuangah na hnenah ra in lungawi thu ka ra lo sim ta men,” tiah a rak sim.

55.    Ms. Annbalik ti mi cu Mother Teresa bawmtu pawl bawm nak ah siseh, harsat nak phurh nak ah khal zohthim tlak mi a si. A mah cu Mother Teresa thawn hnatuan tlang dingah Belgium ram ih thleng mi a si.

Asinain, zengnat a nei ih a duh vek in a cangvai thei lo. Sihmansehla nat nak a tuar nak nunram cu Mother Teresa bawmtu pawlkom hrangah pawlkom sungtel 2600 a rak ngah ter.

56.    Nikhat ah Bawinu in mi thi zik te mina pawl an kilkhawi nak inn in a inn ih a tlun ah an mikhual khaan ah thuthang latu pawl an tonawk lai cu mangbang zet in a rak hmu. Ziang nan tul tiih a suh tikah an nih in Norway ram ih a ra mi kan si.

Nang cu tui kum hrang remdaih nak Nobel Prize thawn sunloih ding na si ruangah kan lo zuk duh,” tiah an rak sim. Kum 1979, December 10 ah Norway khuapi Ausalo khua ah Mother Teresa cu remdaih nak Nobel Prize an rak pek.

57.    Kum 1980, Jan 30 ah India ram ih President Mr. Sanji Varratti in ram ih a sang bik mi sulawihnak a si mi “Bharat Ratna” thawn sunlawih phah in Mother Teresa cu a rak lawm.

58.    Voikhat ih zaanlam ah kum tar thlang mi pakhat cu Kolkata khuapi ih um Sr. pakhat a va suak ih “Zo na tong duh” tiih a suh tikah cu nu cun, “Mother Teresa lawng ka tong duh,” tiah a rak let.

 Sr. cu innpar ah a hung kai ih Mother Teresa hnenah cui thu cu a rak sim ih mikhual khaan ih tong dingah innthuai ah a vung tum.

59.    Mother Teresa in Aluminium darkheng a keng tu kutdawh pakhat a rak tong. A nih in mi hnenih a dil ih a ngah mi Rubi ngun tangka fangthum thawn darkheng cu Mother Teresa hnenah a rak hlu.

 Mother Teresa cun a mangbang tuk ih a ruat. A hlu mi ka cohlan le tu ni ei ding a nei lo ding si khawh. Ka lak lo le a thinnuam lo la la ding fawn,” tiah a ruat ko nain netabik ah cun a rak lak sal.

          A nih in Mother Teresa ih kut pawl cu lunghmui zet in a rak hnam. Sr. in na neih mi zaten rori kei mah i pek thluh. Hi na hlu mi cu Nobel Prize hnak in ka hrangah a man khung ih a sunglawi sawn tiah a rak sim.

60.    Mother Teresa in in Charity kaing cu 1961, Oct 7 ni ah a thok ih kum 36 tiang a mah in a rak hoha. Kum 1997, March 13 ni ah kaing hotu in a cawl ih Sr. Nirmala cu kaing hoha tu thar ah an rak hril. Mother Teresa in ho tu thar Sr. Nirmala hrang thlacam sak in thluasuah a rak pek.

61.    Mother Teresa cu a thin tha a mal ih a taang nat nak cu tu le tu a rak tuar. A mah ai-awh tu an hril nak in a saduhthah a kim thei. Kum 1997, Sep 5, tlawngkai ninga ni, zinglam ah a thinlung nat nak cu besia zet in a rak tuar.

A thinlung dinhmun a tha mal tuk thu sibawi pawl in an rak sim. Netabik ih a rak sim mi cu “Ka thaw ka thaw thei nawn lo,” ti mi a si. Zaan nazi 8:30 ah a nunnak cu Pathian ih kut sungah ap in a nunnak a rak cem.

62.    Mother Teresa ih ruak cu Kolkata khuapi ih um St. Thomas Biakinn ah leitlun ih a mipi pawl in upat sunlawih dingah thlaalang ruakkuang ah an ret ih niriat sung rori an rak ret.

 September 13, zinglam nazi 8:45 ah Mother Teresa ih ruak cu India acozah in ram ruak phum nak vek ih tuah dingah St. Thomas Biakinn in an leh nak tual rawn ah an rak zawn.

          Leitlun hminthang zet mi ruakvuinak caanserh an theh hnuah Mother Teresa ih ruak cu Kolkata khuapi ih Charity Sr. kaing ih an ruuninn ah an rak phum.

63.    Mother Teresa ih ruakvuinak theh veten Mithianghlim ih nemhnget dingah mipi pawl in an rak dil. Pope St. John Paul a pahnih nak in Mithianghlim cannak ih a tulsam mi pawl cek fel nak programme pawl thok dingah a rak fial.

          Kum 2016, September 19 ah Mother Teresa cu Pope Francis in Mithianghlim ah a rak nemhnget. Kolkata khuapi ih Mother Teresa cu a tu ih Saint kan ti mi Mithianghlim St. Teresa thar, Mithianghlim pakhat a si.

https://www.youtube.com/watch?v=p6ZE5y5vN8s&t=463s